Published:Updated:

திருப்பதி கோவிந்தராஜ சுவாமிக்குக் கோலாகல பிரம்மோற்சவம்! -மகிழ்ச்சியில் பக்தர்கள் #Tirupati

கோவிந்தராஜ சுவாமி
கோவிந்தராஜ சுவாமி ( TTD PHOTO )

வேங்கடவன் கோயில் கொள்வதற்கு முன்பாகவே இங்கு கோயில் கொண்டவர் இந்த கோவிந்தராஜப் பெருமாள் என்றும் கூறுவர். அதனால் இவரை, ‘பெரிய அண்ணா’, ‘பெத்த பெருமாள்’ என்று பக்தர்கள் அழைக்கிறார்கள்.

ஏழுமலையானை தரிசனம் செய்ய ஒரு மரபை நம் முன்னோர்கள் வகுத்திருக்கிறார்கள். இன்று பேருந்துகள் நேரடியாக மேல் திருப்பதிக்குச் செல்கின்றன என்பதற்காக நாம் நேரடியாக அங்கு கோயில் கொண்டிருக்கும் வேங்கடவனை உடனடியாக தரிசனம் செய்வது உகந்ததல்ல. முதலில் கீழ்த்திருப்பதியில் இருக்கும் கோவிந்தராஜப் பெருமாளை சேவிக்க வேண்டும். பின் தாயார் அலர்மேல்மங்கையைத் தரிசிக்க வேண்டும். பின்பு மலையேறி வராக தீர்த்தக் கரையில் இருக்கும் ஆதிவராக சுவாமியை தரிசனம் செய்ய வேண்டும். இந்த மூவரின் ஆசிகளைப்பெற்று அதன்பின் வேங்கடவனை தரிசித்தால் கிடைக்கும் பலன்கள் அமோகமாகும். அப்படி வேங்கடவனை தரிசனம் செய்யும் மரபில் முதலில் ஏழுமலைமீது ஏறிச்செல்லும் அனுமதியை நமக்குத் தருபவர் கோவிந்தராஜப் பெருமாள்.

கோவிந்தராஜப் பெருமாள்
கோவிந்தராஜப் பெருமாள்
TTD PHOTO

கிருமிகண்ட சோழன் காலத்தில் சிதம்பரம் கோயிலிலிருந்து வெளியேற்றப்பட்ட கோவிந்த ராஜப் பெருமாளை மீட்டு ஸ்ரீ ராமாநுஜர் இந்தத் தலத்தில் பிரதிஷ்டை செய்தார் என்று சொல்வது உண்டு. ஆனாலும் வேங்கடவன் கோயில் கொள்வதற்கு முன்பாகவே இங்கு கோயில் கொண்டவர் இந்த கோவிந்தராஜப் பெருமாள் என்றும் கூறுவர். அதனால் இவரை, ‘பெரிய அண்ணா’, ‘பெத்த பெருமாள்’ என்று பக்தர்கள் அழைக்கிறார்கள். இந்தப் பெருமாளிடம் தினமும் திருப்பதி கோயில் கணக்குவழக்குகளை வாசிக்கும்முறையும் இருந்துவந்தது.

சயனக் கோலத்தில் காட்சிதரும் கோவிந்தராஜப் பெருமாள், நரசிம்ம மூர்த்தி, கோதண்ட ராமர், ஸ்ரீ ரங்கநாத சுவாமி, சக்கரத்தாழ்வார், ஸ்ரீ ஆண்டாள், மணவாள மாமுனிகள் எனப் பல சந்நிதிகளோடு இந்தத் திருக்கோயில் அமைந்துள்ளது. ஏழுமலையானுக்கு நடைபெறும் உற்சவங்கள் போலவே கோவிந்தராஜப் பெருமானுக்கும் நடைபெறும். இத்தகைய சிறப்புகளையுடைய கோவிந்த ராஜப் பெருமான் கோயிலில் கடந்த வியாழக்கிழமை (28.5.20) அன்று பிரம்மோற்சவம் கொடியேற்றத்துடன் தொடங்கியது.

கொடியேற்றம்
கொடியேற்றம்
TTD PHOTO

வருடம்தோறும் வைகாசிமாதம் கோவிந்தராஜப் பெருமாள் கோயிலில் பிரம்மோற்சவம் நடைபெறுவது வழக்கம். இந்த ஆண்டு நிலவும் அசாதாரணச் சூழல் காரணமாக அனைத்து ஆலயங்களிலும் பக்தர்கள் தரிசனம் செய்ய அனுமதி மறுக்கப்பட்டிருக்கிறது. ஆனாலும் ஆகம முறைப்படி சுவாமிக்கு நடைபெற வேண்டிய பூஜைகள் நடத்தப்பட்டு வருகின்றன. அதேபோல வைகாசி பிரம்மோற்சவ விழாவையும் தவறாது நடத்த தேவஸ்தானம் முடிவு செய்தது. அதன் தொடக்கமாக உற்சவக் கொடியேற்றம் எளிமையாகவும் முறையாகவும் வியாழன் அன்று நடைபெற்றது. இதில் அர்ச்சகர்கள், கோயில் நிர்வாகிகள், திருமலை ஜீயர் உட்பட மிகவும் குறைவான நபர்களே பங்கேற்றனர்.

கோவிந்த ராஜசுவாமி ஸ்ரீதேவி பூதேவி சமேதராகக் கொடிமரம் அருகே எழுந்தருள, கொடிமரத்துக்கு அபிஷேக ஆராதனைகள் செய்யப்பட்டு கருடக்கொடி ஏற்றப்பட்டு பிரம்மோற்சவம் தொடங்கப்பட்டது. ஜூன் 5 -ம் தேதிவரை நீடிக்கும் இந்த உற்சவத்தில் வழக்கம்போல அனைத்து வாகன சேவைகளும் நடைபெறும். ஆனால் அவை அனைத்தும் கோயில் வளாகத்துக்குள்ளாக உள்பிராகாரங்களிலேயே நிகழும். பிரம்மோற்சவத்தின் நிறைவு நாளான ஜூன் 5-ம் தேதி கபிலத் தீர்த்தத்தில்  சக்கரத்தாழ்வாருக்கு தீர்த்தவாரி நடைபெறும் என்று கோயில் நிர்வாகத்தின் சார்பில் தெரிவிக்கப்பட்டுள்ளது.

கருடக்கொடி
கருடக்கொடி
TTD PHOTO

நேரில் சென்று தரிசனம் செய்ய முடியவில்லையே என்ற வருத்தம் இருந்தாலும் சுவாமிக்கு நடைபெற வேண்டிய உற்சவங்கள் குறைவின்றி நடைபெறுவது குறித்து திருப்பதி பக்தர்கள் மகிழ்ச்சியடைந்துள்ளனர்.

அடுத்த கட்டுரைக்கு