Published:Updated:

6.10 அடி உயரம்... பந்தைத் தொட்டால் பாயின்ட்டுதான்.. நெட்பாலில் சாதித்த ஈழத் தமிழ்ப்பெண்!

கார்த்திகா ராஜேந்திரன்

`தர்ஜினி தொட்டால்.. கோல் நிச்சயம்' எனச் சொல்லும் அளவுக்கு இலங்கை அணியில் தவிர்க்க முடியாத இடத்தைப் பிடித்தார் தர்ஜினி.

Tharshini Sivalingam
Tharshini Sivalingam ( AP )

கிரிக்கெட் உலகக்கோப்பை நடந்துகொண்டிருந்த அதே நேரம், பெண்களுக்கான நெட்பால் உலகக்கோப்பை இங்கிலாந்தில் நடைபெற்றது. இத்தொடரில் அதிக கோல்கள் அடித்து தமிழ் ஈழப்பெண் தர்ஜினி சிவலிங்கம் சாதனை படைத்தார். இலங்கையில் நிலவிய அசாதாரண சூழ்நிலைகளுக்கு மத்தியில் விளையாட்டில் சாதிக்கத் தொடங்கிய தர்ஜினியின் பயணம் சாதனைகளால் நிரம்பியது.

இலங்கை யாழ்ப்பாணத்தைச் சேர்ந்த தர்ஜினி, 6.10 அடி உயரம். அசாதாரண தோற்றத்தைக் கொண்ட தர்ஜினிக்கு சிறுவயது முதலே கிண்டலும், கேலியும்தான் கேட்காத பரிசாக வந்து சேர்ந்தன. பள்ளிக்கூடங்களிலும், கல்லூரியிலும் வசைச்சொற்களை மட்டுமே கேட்டு வந்த அவர், வாழ்க்கையின் இக்கட்டான சூழ்நிலையில்தான் விளையாட்டை தேர்ந்தெடுத்தார். நெட்பால் விளையாடத் தொடங்கிய தர்ஜினிக்கு, அவரது உயரம் கைகொடுத்தது.

இலங்கையில் நிலவிய அமைதியற்ற சூழலால், இடம் பெயர்ந்துகொண்டே இருந்தது அவரது குடும்பம். கல்லூரிப் படிப்பை சரியாகத் தொடர முடியாத நிலையிலும், தர்ஜினி கண்ட கனவு, தமிழ் பேராசியராக பணிபுரிய வேண்டும் என்பதே. போராட்டங்களுக்கு மத்தியில் படிப்பைத் தொடர்ந்த தர்ஜினிக்கு, இலங்கை பல்கலைக்கழகத்தில் படித்துக் கொண்டிருந்தபோதுதான் நெட்பால் பற்றிய அறிமுகம் கிடைத்தது. உயரமான தோற்றம் விளையாட்டில் சாதிக்க உதவும் எனப் பயிற்சியாளர் திலகா ஜினதாசா ஊக்கமளிக்க, நெட்பால் விளையாடத் தொடங்கினார் தர்ஜினி.

Tharshini Sivalingam
Tharshini Sivalingam
AP

முதலில் மாவட்ட அளவிலான போட்டிகளில் விளையாடி, பின் இலங்கை தேசிய அணியில் இடம்பிடித்தார். நெட்பால் பற்றிய அனுபமில்லாத அவருக்கு, இந்த உயரம்தான் மிகப்பெரிய ப்ளஸ். இந்த உயர்த்தைக் காரணம்காட்டி வசைச்சொற்களை மட்டுமே பரிசாகப் பெற்று வந்த தர்ஜினி, ``எனக்கு ஏன் இப்படி?" என்று கேட்பதை விட்டுவிட்டு ``எனக்கு மட்டும்தான் இப்படி" என மாற்றி யோசித்தார். முறையான பயிற்சி மேற்கொண்ட அவர், நெட்பால் விளையாட்டில் முழு ஈடுபாடு செலுத்தினார்.

2011-ம் ஆண்டு சிங்கப்பூரில் நடந்த பெண்களுக்கான நெட்பால் உலகக்கோப்பையில் இலங்கை அணி சோபிக்கவில்லை. ஆனால், அந்தத் தொடரில் மொத்தம் 290 கோல்கள் அடித்த தர்ஜினி, சர்வதேச நெட்பால் நட்சத்திரமாக கவனம் ஈர்த்தார். `தர்ஜினி தொட்டால்.. கோல் நிச்சயம்' என சொல்லும் அளவுக்கு இலங்கை அணியில் தவிர்க்க முடியாத இடத்தைப் பிடித்தார்.

ஆனால், இலங்கை நெட்பால் அமைப்பில் ஏற்பட்ட சர்ச்சைகள் காரணமாக 2015 முதல் 2017 வரை தேசிய அணியில் விளையாட தர்ஜினி தேர்ந்தெடுக்கப்படவில்லை. இரண்டு ஆண்டுகள் இடைவெளிக்குப் பிறகு மீண்டும் அணிக்குத் திரும்பிய அவர், தனது வழக்கமான ஆட்டத்தைத் தொடர்ந்தார். 2018 நெட்பால் ஆசிய கோப்பையில் இலங்கை அணி சாம்பியன் பட்டம் வெல்ல முக்கிய பங்காற்றினார்.

இந்த ஆண்டு, இங்கிலாந்து லிவர்பூலில் நடைபெற்ற பெண்களுக்கான நெட்பால் உலகக்கோப்பையில் அசத்திய தர்ஜினி, இத்ந்த தொடரில் அதிக கோல்கள் அடித்த வீராங்கனையானார்.

2019 நெட்பால் உலகக்கோப்பையில் அதிக கோல்கள்

தர்ஜினி சிவலிங்கம் - இலங்கை - 348
ஜனைல் ப்ளார் - ஜமைக்கா - 304
லென்சி போட்கேட்டர் - தென்னாப்ரிக்கா - 243

375 வாய்ப்புகளில் 348 முறை கோலாக்கினார் தர்ஜினி. அதுமட்டுமின்றி, சிங்கப்பூர் அணிக்கு எதிரான போட்டியில் 77 கோல்கள் அடித்து, ஒரே போட்டியில் அதிக கோல் அடித்த வீராங்கனையாகவும் உலக சாதனை படைத்தார்.

இந்த உலகக்கோப்பையில் இலங்கை அணி 15-வது இடத்தையே பிடித்தது. எனினும், ஒவ்வொரு போட்டியிலும் எதிரணியை கோல் அடிக்கவிடாமல் திக்குமுக்காட வைத்துவிட்டார் தர்ஜினி!

நாற்பது வயதாகும் இந்த நெட்பால் நட்சத்திரம், உலகக்கோப்பை தொடரோடு தனது விளையாட்டுப் பயணத்துக்கு ஓய்வு அறிவித்துவிட்டார். இளம் வீராங்கனைகளுக்கு ரோல் மாடலாக இருக்கும் தர்ஜினி நெட்பால் விளையாட்டிலிருந்து விடைபெற்றிருக்கலாம், ஆனால், இலங்கை நெட்பால் மகளிர் அணிக்கு இதுவே தொடக்கம்!