ரூ 6,000 பட்ஜெட் என்ன மொபைல் வாங்கலாம்?

புதிதாக மொபைல் வாங்கும் அனைவருக்கும் 4ஜி வசதி கொண்ட மொபைல்களே முதல் சாய்ஸாக இருக்கின்றன. 4ஜி வசதி கொண்ட மொபைல்களின் விலை கொஞ்சம் அதிகம் என்பதால், வாடிக்கையாளர்களைக் கவர பல மொபைல்  நிறுவனங்களும், குறைந்த பட்ஜெட்டில் நல்ல 4G மொபைல்களைத் தொடர்ந்து அறிமுகப்படுத்தி வருகின்றன. அவற்றில் சில இங்கே...

Redmi 4A

ரெட்மி போன்களில் புதுவரவு இந்த 4A. 13 மெகா பிக்ஸல் கேமரா, 3120 mAh பேட்டரி, ஸ்னாப்ட்ராகன் 425 பிராசஸர், ஃபுல் ஹெச்.டி டிஸ்ப்ளே எனக் குறைந்த விலைக்கு, நிறைந்த வசதிகளுடன் இந்த மாடல் கிடைக்கிறது. இந்த மாடலில் உள்ள டூயல் அப்ளிகேஷன் ஆப்ஷன் மூலம் ஃபேஸ்புக், ட்விட்டர் போன்ற பல அப்ளிகேஷன்களில் ஒரே நேரத்தில் இரண்டு அக்கவுன்ட்களைப் பயன்படுத்தலாம். ஹைப்ரிட் சிம் ஸ்லாட் இருப்பது இதன் மைனஸ். குறைந்த விலைக்குக் கவர்ச்சிகரமான தோற்றத்தில் கிடைப்பதால், சந்தையில் செம ஹிட்!

விலை: ரூ.5,999

Xolo Era 2

ஜோலோ மொபைலின் ஈரா 2 மாடலின் சிறப்பம்சமே இதன் சிம்பிளான வடிவமைப்புதான். 5 இன்ச் அளவு கொண்ட இதன் டிஸ்ப்ளே மிகவும் பிரகாசமானது. இதில் 4ஜி வசதி உண்டு. இதன் முன்பக்கமும், பின்பக்கமும் 5 மெகா பிக்ஸல் கேமரா உள்ளது. மேலும், முன்பக்கமும் ஃப்ளாஷ் இருப்பதால், ஒளி குறைந்த இடங்களிலும் அட்டகாசமான செல்ஃபி எடுக்க முடியும். 1 ஜி.பி ரேம், 8 ஜி.பி இன்டர்னல் மெமரி மற்றும் 2350 mAh பேட்டரி திறனுடன் விற்பனைக்கு வந்துள்ளது. ஜியோவின் வெல்கம் ஆஃபரும் இந்த மாடலுக்குக் கிடைப்பது எக்ஸ்ட்ரா சிறப்பு.

விலை : ரூ. 4,777

Karbonn Titanium Vista 4G

கண் கவரும் வகையில் அழகான வடிவமைப்பு, லேட்டஸ்ட் தொழில்நுட்ப வசதிகள் கொண்டதாக விற்பனைக்கு வந்துள்ளது கார்பன் நிறுவனத்தின் டைட்டானியம் விஸ்டா 4G மாடல். 4ஜி வசதி கொண்ட இந்த மாடலில், 8 ஜிபி இன்டர்னல் மெமரி, 5 மெகா பிக்ஸல் கேமரா, 2300 mAh பேட்டரி திறன் போன்ற வசதிகள் உள்ளன. இந்த மாடல் கறுப்பு மற்றும் வெள்ளை  நிறங்களில் கிடைக்கின்றன. குறைந்த விலை, அழகான வடிவமைப்பு கொண்ட ஸ்மார்ட் போன் வாங்குபவர்கள் இதைப் பரிசீலிக்கலாம்.

விலை : ரூ. 4,999

Micromax Spark Vdeo

குறைந்த விலை மொபைல்களுக்குப் புகழ்பெற்ற நிறுவனம் மைக்ரோமேக்ஸ். இந்த நிறுவனத்தின் ஸ்பார்க்  Vdeo மாடலானது 4 ஜி வசதியுடன் கடந்த மாதம் அறிமுகமாகியுள்ளது. டூயல் சிம், 1 ஜி.பி ரேம், 8ஜிபி இன்டர்னல் மெமரி என இதன் வசதிகள் அசத்துகின்றன. ஆனால், இதன் பேட்டரி திறன் 1800 mAh மட்டுமே என்பதும், கேமராவின் அளவு 5 மெகா பிக்ஸல் மட்டுமே என்பதும் இதன் மைனஸ். 4ஜி சிம் பயன்படுத்தக்கூடிய இந்த மொபைல் கோல்டன் நிறத்தில் மட்டுமே கிடைக்கிறது.

விலை : ரூ.4,499

Lyf Wind 7I

ஜியோ நிறுவனத்துக்குச் சொந்தமான லைஃப் மொபைலின் Wind 7I மாடல், குறைந்த விலையிலும் நிறைவான வசதிகளுடன் கிடைக்கிறது. லைஃப் மொபைல்களுக்கென்றே பிரத்யேகமாக பல அதிரடி டேட்டா பிளான்களையும் ஜியோ வழங்குகிறது என்பது கூடுதல் சிறப்பு. 4ஜி வீடியோ கால் செய்வதற்கு ஏதுவாக இதன் முன்பக்க கேமரா 5 எம்.பி திறன் கொண்டதாக வடிவமைக்கப்பட்டுள்ளது. 8 எம்.பி கேமரா, 1 ஜி.பி ரேம், 8 ஜி.பி இன்டர்னல் மெமரி என இதன் சிறப்பம்சங்கள் நிறைவாகவே இருக்கின்றன. ஜியோவின் 4ஜி சேவையை அதிகம் பேர் பயன்படுத்த வேண்டும் என்பதற்காகவே அந்நிறுவனம், இதுபோன்ற பல மொபைல் மாடல்களையும் குறைந்த விலைக்கு வழங்கி வருகிறது.

விலை : ரூ.5,499

Intex Aqua Amaze Plus

இன்டெக்ஸ் நிறுவனத்தின் Amaze Plus மொபைல் மாடல் HD டிஸ்ப்ளே, 8 ஜிபி இன்டர்னல் மெமரி ஆகியவற்றைக் கொண்டது.  5 மெகா பிக்ஸல் கேமராவுடன், ஆட்டோ ஃபோகஸ், ஃபேஸ் டிடெக்சன் போன்ற வசதிகளும் கொண்டதாக இருக்கிறது. 4ஜி இன்டர்நெட் டேட்டா கால் மற்றும் வீடியோ கால் வசதியும் இதில் உள்ளது. லோ-பட்ஜெட் மொபைல் என்றாலும் 1 ஜிபி ரேம் மற்றும் 2000 mAh பேட்டரி திறனுடன், அழகான வடிவமைப்புடன் கிடைக்கிறது இந்த அமேஸ் ப்ளஸ்.

விலை : ரூ. 5,049