Published:Updated:

இனி இல்லை... செக்போஸ்ட் தொல்லை! - 7

இனி இல்லை... செக்போஸ்ட் தொல்லை! - 7
பிரீமியம் ஸ்டோரி
இனி இல்லை... செக்போஸ்ட் தொல்லை! - 7

தொடர் / லாஜிஸ்டிக்ஸ்ரவிச்சந்திரன், டெபுட்டி மேனேஜிங் டைரக்டர், டிவிஎஸ் லாஜிஸ்டிக்ஸ்

இனி இல்லை... செக்போஸ்ட் தொல்லை! - 7

தொடர் / லாஜிஸ்டிக்ஸ்ரவிச்சந்திரன், டெபுட்டி மேனேஜிங் டைரக்டர், டிவிஎஸ் லாஜிஸ்டிக்ஸ்

Published:Updated:
இனி இல்லை... செக்போஸ்ட் தொல்லை! - 7
பிரீமியம் ஸ்டோரி
இனி இல்லை... செக்போஸ்ட் தொல்லை! - 7

பெரிய ஷாப்பிங் ஸ்டோர்களில் ஒரு சிக்கல் உண்டு. பர்ச்சேஸ் எல்லாம் சீக்கிரம் முடிந்துவிடும். ஆனால், வாங்கிய பொருட்களுக்கு பில் போடுவதற்குள், இன்னொரு பர்ச்சேஸிங்கே முடித்துவிடலாம். இங்கே பில் போடுவதற்கான நேரம்தான் பர்ச்சேஸிங் நேரத்தைவிட அதிகமாக இருக்கும். சாதாரண ஷாப்பிங்குக்கே இப்படி என்றால், லட்சங்களில் பொருட்களை ஏற்றிச் செல்லும் லாஜிஸ்டிக்ஸின் முதுகெலும்பான லாரித் தொழிலுக்குச் சொல்லவா வேண்டும்?

முன்பெல்லாம் ஒவ்வொரு செக்போஸ்ட்களிலும் ‘காத்திருந்து காத்திருந்து காலங்கள் போகுதடி’ எனும் இளையராஜா பாடல்தான் ஒலித்துக்கொண்டிருக்கும். கேரளா, கர்நாடகா போன்ற மாநிலங்களில் நாள்கணக்கிலெல்லாம் லாரிகள் நிறுத்தப்பட்டிருப்பதை நீங்கள் பார்த்திருப்பீர்கள். சென்னையில் இருந்து பெங்களூருவுக்கு லாரிப் பயணம் 8 மணி நேரத்துக்குள் முடிந்துவிடும். அதாவது, ஓர் இரவு. ஆனால், சில லாரிகள் 4 நாட்களெல்லாம் காத்திருந்துதான் பொருட்களை டெலிவரி செய்திருக்கிறார்கள். காரணம், முறையான டாக்குமென்ட்கள் இல்லாதது மற்றும் மேனுவல் பிராசஸிங் முறை.   செக்போஸ்ட்களில் நெரிசலும் அதிகம்.

இப்போது அந்தச் சிக்கலுக்கு விடை கிடைத்துள்ளது. காரணம், ‘eWay பில்’. இந்த ஜூன் மாதத்திலிருந்து இந்த ‘eWay பில்’ நடைமுறைக்கு வந்துள்ளது. ஒரு வகையில் இந்த ‘eWay பில்’ என்பது லாஜிஸ்டிக்ஸ் துறைக்கு வரமே என்று சொல்லலாம். எப்படி?

இனி இல்லை... செக்போஸ்ட் தொல்லை! - 7

படம்: ரமேஷ் கந்தசாமி

‘eWay பில்’-க்கு முன்பு என்ன நடைமுறை?

அதாவது, ஒரு பொருளை ஓர் இடத்தில் இருந்து இன்னோர் இடத்துக்குக் கொண்டு செல்லும்போது, அந்தப் பொருளின் மதிப்பு, யாருடைய மெட்டீரியல், என்ன வகையான பொருள், அதற்கான வரி என அனைத்தையும் சேர்த்து ‘Way Bill’ என்கிற ஒன்று தயாரிக்கப்படும். அந்த ‘Way Bill’-ஐ ஒவ்வொரு மாநில செக்போஸ்ட்டிலும் காண்பித்து, அப்ரூவல் வாங்கிக் கிளம்புவதுதான் லாஜிஸ்டிக்ஸின் பெரிய சிக்கலாக இருந்தது. ‘Way Bill’ இல்லையென்றால், அந்தப் பொருளைக் கடத்தல் பொருள் என்றுகூட சொல்லலாம் என்பதுதான் சட்டம். அதற்காகத்தான் செக்போஸ்ட்கள் உருவாயின.

அப்படி ‘Way bill’ இருக்கும் எல்லா டிரான்ஸ் போர்ட்டேஷனும் முறையானதா என்றால், அதிலும் 100% உறுதியளிக்க முடியாது. சிலர் போலி பத்திரங்களையும் ரெடி செய்து சட்டத்தை ஏமாற்றும் ஃபோர்ஜரிகளும் நடந்து வந்துள்ளன. சிலர் சொந்தச் சரக்கு என்று காண்பித்து வரியிலிருந்து தப்பிப்பார்கள். ஒவ்வொரு செக்போஸ்ட்டிலும் இதனால்தான் தாமதம் ஏற்பட்டு வந்தது. ஒவ்வொரு லாரியையும் செக் செய்து, வழியனுப்பி வைப்பதற்குள் நாள்கணக்காகி விடும். இதற்காக போலீஸ் கண்காணிப்பெல்லாம் இருந்துவந்தது. ‘ஒரு பொருளை லாரியில் கொண்டு வர்றாங்க’ என்று நாம் இதைச் சாதாரணமாக நினைத்து விடுகிறோம். ஆனால், இதற்குப் பின்னால், இவ்வளவு நடைமுறைச் சிக்கல்கள் இருந்து வந்தன.

இனி இல்லை... செக்போஸ்ட் தொல்லை! - 7

‘eWay பில்’ என்றால் என்ன?

ஆரம்பத்தில் டிரான்ஸ்போர்ட்டர்களை நம்பியிருந்த டாக்குமென்டேஷன் நடைமுறைகளை, இப்போது அரசாங்கமே ஏற்றுக்கொள்கிறது. அதாவது, பொருட்களை ஏற்றிச் செல்வதற்கு முன்பே பில் போடப்படுகிறது. இதனால், பெருஞ்சுமை குறைகிறது என்பதுதான் உண்மை. இப்போது இங்கே அரசாங்கமே டிரான்ஸ்போர்ட்டர் வேலையைச் செய்கிறது. ஒரு பொருளை ஏற்றிச் செல்லும்போது, அதற்கான அத்தாட்சியாக அரசாங்கம் ஒரு நம்பர் கொடுக்கிறது. இதற்கு ஒரு வேலிடிட்டி உண்டு. இதற்குப் பெயர்தான் ‘eWay பில்’. இந்த ‘eWay பில்’ நம்பரைக் காட்டினால், யாருக்கும் பதில் சொல்ல வேண்டிய அவசியமில்லை. அரசாங்கமே இந்த நம்பரைக் கொடுக்கிறது என்பதால், இது சட்டப்பூர்வ விஷயமாகிறது. இதனால், யாரும் உங்களைக் கேள்வி கேட்க வாய்ப்பே இல்லை. நடுவில் லஞ்ச லாவண்யங்களுக்கும் இடமில்லை. ஒரு ஜென்யூன் டிரான்ஸாக்ஷன் இங்கே நடப்பதற்கான சாத்தியங்கள் அதிகம்.

தமிழகம் உட்பட இந்தியாவின் அனைத்து மாநிலங்களும் இப்போது இந்த ‘eWay பில்’ நடைமுறைக்கு வந்துவிட்டன. 50,000 ரூபாய்க்கு அதிகமான மதிப்புள்ள பொருட்களை சாலை, விமானம், ரயில், கப்பல் என்று எந்தப் போக்குவரத்தில் இடம் பெயர்க்கும்போதும் இந்த ‘eWay பில்’ நிச்சயம் தேவை.

எத்தனை நாட்கள் வேலிடிட்டி?

உதாரணத்துக்கு, ஒரு கார்கோ லாரியில் பொருட்கள் ஏற்றிச் செல்லப்படுகின்றன. பொருட்களைக் கொண்டுசேர்க்கும் தூரம் 100 கி.மீக்குள் இருந்தால், ஒரு நாள் அவகாசம். இது ஒவ்வொரு 100 கி.மீ-க்கும் ஒரு நாள் கூடும். ஒரு நாள் காலவரம்பு என்பது, அடுத்த நாள் இரவு 12 மணி வரை செல்லும். உதாரணத்துக்கு, நீங்கள் ஜூலை 2-ம் நாள் 2 மணிக்கு ஒரு ‘eWay பில்’ ஜெனரேட் செய்கிறீர்கள் என்றால், ஜூலை 3-ம் நாள் நள்ளிரவு 12 மணி வரை அந்த ‘eWay பில்’ எக்ஸ்பயர் ஆகாது. இது Part-A.

ஏதேனும் இயற்கைக் கோளாறுகள் காரணமாக, இந்தக் கால அவகாசம் நீட்டிக்கப்படும் பட்சத்தில், ‘Part B’ எனும் விண்ணப்பத்தில் காலவரம்பை நீட்டிக்க வேண்டும். அதாவது, ரெனியூவல் பண்ண வேண்டும். ‘eWay பில்’ அதிகாரி மறுபடியும் உங்கள் வாகனத்தைச் சோதனையிட்டு, இதற்கான ஒப்புதல் கையெழுத்துப் போடும்போது அது உறுதியாகும்.

இனி இல்லை... செக்போஸ்ட் தொல்லை! - 7

யார் யார் எடுக்க வேண்டும்?

பெரிய லாஜிஸ்டிக் நிறுவனங்கள், தங்களுக்கான GST நம்பரில் இருந்து ‘eWay பில்’ எடுப்பது சுலபமான நடைமுறை.

தனிப்பட்ட முறையில் ஒரு தனிநபரோ அல்லது பதிவு செய்யப்படாத நிறுவனமோ ‘eWay பில்’ எடுக்க வேண்டிய பட்சத்தில், Form GST EWB-01 என்னும் விண்ணப்பத்தில் ஜெனரேட் செய்துகொள்ளலாம். gst.gov.in எனும் அரசாங்க வலைதளத்தில் இதற்கான விண்ணப்பம் இருக்கும். இதுவே பதிவு செய்யப்படாத நபர், பதிவு செய்யப்பட்ட நிறுவனத்துக்கு அனுப்பும்போது, இந்த நடைமுறை இன்னும் எளிதாக முடியும். உங்கள் வேலையை அந்தப் பதிவு செய்யப்பட்ட நிறுவனமே பார்த்துக் கொள்ளும்.

எப்போது ‘eWay பில்’ தேவையில்லை?

* ஒரே மாநிலத்துக்குள், 20 கி.மீ-க்குள், ஒரு பொருளை ஏற்றிச் செல்லும்போது...

* நான் மோட்டாரைஸ் கன்வேயன்ஸ் வாகனங்கள், அதாவது ட்ரை-சைக்கிள், மாட்டு வண்டி போன்றவற்றைப் பயன்படுத்தும்போது...

* வீடு மற்றும் அலுவலக இடமாற்றம் செய்யும் நோக்கத்தில் பொருட்களை ஏற்றிச் செல்லும்போது.

* பெட்ரோலியம், மது பாட்டில்கள், கேஸ் போன்ற அரசாங்கம் சம்பந்தமான பொருட்கள் ஏற்றிச் செல்லும்போது.

* காலி கார்கோ கன்டெய்னர்களை லோடு அடிக்கும்போது.

* தபால் மற்றும் அஞ்சல் துறை போன்ற அரசு சம்பந்தமான லோடுகளில்.

* கஸ்டம் செக்கிங் முடிந்து, துறைமுகத்தில் இருந்தோ, விமான நிலையத்தில் இருந்தோ பொருட்கள் வரும்போது...

இப்படி சில விஷயங்களுக்கு ‘eWay பில்’ தேவையில்லை.

நல்லதா கெட்டதா?

நிச்சயம் இது நல்ல விஷயம்தான். இந்த முறையால், பல செக்போஸ்ட்கள் அப்புறப்படுத்தப்பட்டுவிட்டன. ‘eWay பில்’ நம்பரை செக் செய்தால் போதும்.டிரான்ஸ்போர்ட்டர் யார், வாகனம் யாருடையது, பொருள் யாருடையது, எவ்வளவுக்கு விற்கப்பட்டிருக்கிறது, வரி கட்டியிருக்கிறதா, எந்த நிறுவனத்துக்கு அந்தப் பொருள் போய்ச் சேர இருக்கிறது, லாப-நஷ்டம் எவ்வளவு போன்ற எல்லா விஷயங்களையும் அரசாங்கத்துக்கு நாம் ஒளிவுமறைவின்றிச் சொல்கிறோம். இனி செக்போஸ்ட்டில் காத்திருத்தல் கவலை வேண்டாம். ஊழல் போன்ற சமாச்சாரங்களும் குறைய வாய்ப்புண்டு என்பது இந்தத் துறைக்கு நல்ல ஓப்பனிங்தானே!

- சரக்கு பெயரும்

தொகுப்பு: தமிழ்