Published:Updated:

சர்வைவா - 31

சர்வைவா - 31
பிரீமியம் ஸ்டோரி
News
சர்வைவா - 31

சர்வைவா - 31

“You stood on the shoulders of geniuses to accomplish something as fast as you could and before you even knew what you had, you patented it and packaged it and slapped it on a plastic lunchbox, and now you’re selling it.” 

- ஜுராசிக் பார்க் படத்தில் வருகிற வசனம் இது. ஆபத்தான டைனோசர்களை உற்பத்தி செய்து அதைக் காட்சிப்பொருளாக்குகிற முதலாளி ஜான் ஹேமன்ட்டிடம் கணிதவியல் நிபுணர் இயான் மால்கம் இதைச்சொல்லுவார்.

சர்வைவா - 31

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

Ready... Think... Attack...

DARPA (Defense Advanced Research Projects Agency) அமெரிக்க ராணுவத்தின் பிரதான ஆராய்ச்சி நிறுவனம். உலக வல்லரசாக அமெரிக்காவை மாற்றியதில் டார்பாவின் பங்கு மிகப்பெரியது. மூளையிலிருந்து சிந்தனைகளை சிக்னல்களாக அனுப்பி கருவிகளை இயக்குகிற தொழில்நுட்பத்தைத் தயாரிப்பதில் டார்பாதான் உலக அரங்கில் முன்னோடி. 

சர்வைவா - 31



சமீபத்தில் அப்படி ஒரு புதிய தொழில்நுட்பத்தை உலகுக்கு அறிமுகப்படுத்தியது டார்பா. போர் விமானங்களைப் பல கிலோமீட்டர்களுக்கு அப்பால் இருந்தே ராணுவ வீரர் ஒருவருடைய மூளையின் வழி இயக்கக்கூடிய புதிய தொழில்நுட்பம். மூளையில் உருவாகிற சிக்னல்களைச் செயற்கை நுண்ணறிவு மென்பொருள்களின் வழி குறிப்பிட்ட வேலைகளைச் செய்யவைக்கிற தொழில்நுட்பம் இது.

இதன்வழி, சிந்திப்பதன் மூலமாகவே போர்விமானங்களை விரும்பிய திசையில் பறக்கச்செய்வது, வேகத்தைக் கட்டுப்படுத்துவது, உளவு பார்ப்பது, குண்டுகள் போடுவது என அனைத்தையும் செய்ய முடியும். அதுவும் ஒரே ஆள் ஒரே நேரத்தில் மூன்று விமானங்களை இயக்கலாமாம். போர்த்துறையின் எதிர்காலம் இதுதான்.

மண்டையோட்டைப் பிளந்து மூளையிலேயே நேரடியாக சிப்களைப் பொருத்திதான் இந்த ஆராய்ச்சிகளை டார்பா பல ஆண்டுகளாகச் செய்துகொண்டிருந்தது. ஆனால், இந்த பாணி மனித மூளைக்குப் பாதிப்புகளை உண்டாக்கிவிடும். எனவே பல ஆண்டுகளாக இந்த ஆராய்ச்சியை மனிதர்களைக்கொண்டு செய்து பார்ப்பதில் சுணக்கம் உருவாகியிருந்தது. இப்போதுதான் மூளைக்கு வெளியே இருந்தே செயல்படக்கூடிய Next-Generation Nonsurgical Neurotechnology (N3) என்கிற தொழில்நுட்பத்தைக் கண்டுபிடித்திருக்கிறார்கள். இதன்மூலம் வேலை இருக்கும்போது மட்டும் அந்த சிப்பை அணிந்துகொண்டு மற்ற நேரங்களில் கழற்றிக்கொள்ளலாம். இது ராணுவத்துக்கு மட்டுமல்ல கமர்ஷியல் பயன்பாட்டுக்கும் ஏற்றது.

இந்தத் தொழில்நுட்பத்தின் மூலம் போர்விமானங்களை மட்டுமல்ல, டாங்கிகளை, ஆயுதம் தாங்கிய ரோபோக்களை, உளவுக்கருவிகளை என எதையுமே இயக்கமுடியும். இனி வரும் போர்களில் இந்த சிந்தனா தாக்குதல்கள் அதிகமிருக்கும். இது போர்களின் போக்கை மாற்றக்கூடியது. மனிதகுல வரலாற்றில் இரும்பு ஆயுதங்களும் துப்பாக்கிகளும், ராக்கெட்டுகளும், பீரங்கிகளும், அணு ஆயுதங்களும் உருவாக்கிய மாற்றங்களுக்கு இணையான மாற்றங்களை `சிந்தனை வழி ஆயுதங்கள்’ செய்யும். என்னமாதிரி மாற்றங்கள் என்பதைப் பார்க்க, போர்வரும் வரை காத்திருப்போம்.

போட்டா போட்டி!


ரெஜினா டூகன் டார்பாவின் முன்னாள் இயக்குநர். இப்போது அவர் வேலை பார்த்துக்கொண்டிருப்பது ஃபேஸ்புக் நிறுவனத்தின் மார்க் சக்கர்பெர்க்குக்காக. ஃபேஸ்புக் நிறுவனத்தின் Experimental technologies division என்று அழைக்கப்படும் `பில்டிங் 8-ல்’ முக்கியப் பதவியில் இருக்கிறார். ராணுவ ஆராய்ச்சியாளருக்கு ஃபேஸ்புக்கில் என்ன வேலை? 

சர்வைவா - 31

பில்டிங் எய்ட்டில் அவருடைய முக்கியமான ஆராய்ச்சி... மூளையில் சிந்திப்பதை அப்படியே செயலாக மாற்றக்கூடிய தொழில்நுட்பத்தை உருவாக்குவது. ``இப்போதைக்கு சிந்தனைகளின் வழி விநாடிக்கு நூறு வார்த்தைகள் டைப் பண்ணக்கூடிய ஒரு எளிய தொழில்நுட்பத்தை உருவாக்குகிறோம்’’ என்கிறார் மார்க் சக்கர்பெர்க். இவ்வளவு சிம்பிள் ஆராய்ச்சிக்காக டார்பாவின் இயக்குநர் எதற்கு? இது அதையும் தாண்டிய ஆராய்ச்சி என்கிறார்கள். மார்க் பெரிதாக எதற்கோ திட்டமிடுகிறார் என சந்தேகப்படுகிறார்கள் கன்ஸ்பீரஸியர்கள்.

மார்க் சக்கர்பெர்க் மட்டுமல்ல; எலான் மஸ்க்கும் இதே வேலையையே செய்கிறார். கார்களை சிந்தனைகளின் வழி இயக்குகிற தொழில்நுட்பத்திற்காக ரொம்பவே மெனக்கெடுகிறார். அதற்காகக் கோடிகளைக் கொட்டி வெவ்வேறு ஸ்டார்ட் அப்களை வளைத்துப் போட்டிருக்கிறார். கார்கள் தயாரிக்கும் நிஸான் நிறுவனம்கூட Brain to Vehicle என்கிற புராஜெக்ட்டை சாத்தியப்படுத்த முயற்சி செய்கிறார்கள்.

இன்டர்நெட் எக்ஸ்ப்ளோரர் தெரியுமா? இப்போதெல்லாம் யாரும் அதிகமாகப் பயன்படுத்துவதில்லை. கிரகப்பிரவேசத்து கடிகார கிப்ட்போல நம் விண்டோஸ்களில் ஒரு மூலையில் இன்னமும் அந்த நீல நிற e-அநாதையாகக் கிடக்கிறது. ஆனால் ஒருகாலத்தில் பிரவுசர் என்றாலே IEதான். 90-களின் கிட்ஸுக்குத் தெரிந்திருக்கும்... ஓர் இணையதளம் முழுமையாகத் திறக்க ஒரு யுகமே ஆகிவிடும். அந்த இன்டர்நெட் எக்ஸ்ப்ளோரரை உருவாக்கியவர் தாமஸ் ரியர்டன். இப்போது அவர் மைக்ரோசாஃப்ட்டில் இல்லை. CTRL LABS என்கிற நிறுவனத்தைத் தொடங்கி, தீவிர ஆராய்ச்சியில் இருக்கிறார். அவருடைய ஆராய்ச்சிக்கெனக் கோடிக்கணக்கான பணத்தை அள்ளி அள்ளிக் கொடுத்துக்கொண்டிருக்கிறது அமேசான் நிறுவனம்!

தாமஸ் பண்ணுகிற ஆராய்ச்சியும் சிந்தனைகளின் வழி கருவிகளை, கணினிகளை, ரோபோக்களை, பெரிய பெரிய எந்திரங்களை, மென்பொருள்களை இயக்குகிற ஒரு தொழில்நுட்பத்தை உருவாக்குவதுதான். மற்ற ஆராய்ச்சிகள் போல மூளையிலிருந்து கிடைக்கிற சிக்னல்களைக் கருவிகளுக்குக் கடத்த வேறு மாதிரியான முறைகளைக் கையாள்கிறார் தாமஸ். ஆனால் நோக்கம் ஒன்றுதான்.  இப்போதைக்கு, கைகளில் கட்டுகிற ஒரு ரிஸ்ட் பேண்ட் மாதிரியான ஒன்றின் வழி மூளையின் சிக்னல்களைப் பிடித்து அதன் மூலம் கருவிகளை இயக்கிவருகிறார்கள்.  

சர்வைவா - 31



`நீங்க என்ன வேணா பண்ணுங்க, காசு தர நாங்க இருக்கோம்’ எனத் துணைக்கு நிற்கிறது அமேசான். கன்ட்ரோல் லேப்ஸ் மட்டுமல்ல, தால்மிக் லேப்ஸ் என்கிற நிறுவனமும் இதே வகை ஆராய்ச்சியில்தான் ஐந்தாண்டுகளாக இருக்கிறது. அந்த நிறுவனத்திற்கும் சமீபத்தில் 120 மில்லியன் டாலர்களை அள்ளிக்கொடுத்திருக்கிறது அமேசான்.

உலகெங்கும் சிந்தனைகளின் வழி கருவிகளை இயக்கும் தொழில்நுட்பத்தைச் சாத்தியப்படுத்த ஏராளமான ஆராய்ச்சிகள் நடந்துகொண்டிருக்கின்றன. மருத்துவத்துறையில் இத்தகைய ஆராய்ச்சிகளுக்குப் பெரிய சந்தையே உருவாகியிருக்கிறது.

Neurable என்கிற நிறுவனம் VR தொழில்நுட்பத்தின் சிந்தனைகளின் வழி ஆடக்கூடிய கேம்களைத் தயாரிக்கிறார்கள். இந்த கேம்களை ஆட ஜாய்ஸ்டிக் மாதிரி எந்த உபகரணங்களும் தேவையில்லை, சிந்தனை போதும். Emojime என்கிற நிறுவனம் உருவாக்கியிருக்கிற மென்பொருள் நம்முடைய மூளையின் செயல்பாடுகளை அறிந்து நாம் என்ன உணர்வில் இருக்கிறோம் என்பதை அறிந்து அதற்கேற்ப எமோஜிகளை உருவாக்கும்படி தயாரிக்கப்பட்டுள்ளது! Emotiv என்கிற நிறுவனம் தயாரித்திருக்கிற மென்பொருளின் மூலம் சிந்தனைகளின் வழி வீட்டு உபயோகப்பொருள்கள் அனைத்தையும் கட்டுப்படுத்தலாம். வீட்டைப் பூட்டுவதில் தொடங்கி, கேஸ் ஸ்டவ்வை அணைப்பது வரை அனைத்தும் செய்யலாம். பிலிப்ஸ் நிறுவனம் எமோட்டிவ்வோடு சேர்ந்து ஸ்மார்ட் ஹோம்களை உருவாக்கிவருகிறார்கள்.

எமோட்டிவ் மென்பொருளைக் கொண்டு லிசா பார்க் என்னும் இசைக்கலைஞர் தன் மூளையில் உருவாகும் உணர்வுகளை அப்படியே ஒலியலைகளாக மாற்றி, அதை இசையாக்கி நிகழ்ச்சிகள் நடத்துகிறார். எப்படி என்பதை இந்த வீடியோவில் பார்க்கலாம். https://youtu.be/ZXMXqULrEWg

அடுத்து என்ன?


இன்று கிட்டதட்ட நம் மூளைகள் சிந்திப்பதைக்கொண்டே கருவிகளை இயக்குகிற தொழில்நுட்பம் நன்றாகவே வந்துவிட்டது. நம் வீட்டுவாசலுக்கு வர சில ஆண்டுகள் பிடிக்கலாம். ஆனால் ஜுராசிக்பார்க்கின் ஜான் ஹேமன்ட்டைப்போல பெரிய நிறுவனங்கள் இதன் ஆபத்துகளை உணராமல் அவசர அவசரமாக நம் மூளைகளைப் பதம் பார்க்கிற தொழில்நுட்ப டைனோசர்களை உற்பத்தி செய்துகொண்டிருக்கின்றன.

கருவிகளை நேரடியாக மூளைகளோடு தொடர்புகொள்ளவைப்பதால் என்ன மாதிரியான பாதிப்புகளை மனிதகுலம் சந்திக்கப்போகிறது?  சைபர் தீவிரவாதிகளின் தாக்குதலுக்கு இந்த சிப் வைத்த மூளைகள் ஆளானால்? தீவிரவாதிகள் நேரடியாக அப்பாவிகளின் மூளைகளில் விஷக்கருத்துகளைப் பரப்பினால்? இந்தத் தொழில்நுட்பமெல்லாம் உடல் மற்றும் மனரீதியில் என்ன மாதிரியான பின்விளைவுகளை உண்டாக்கும்? எத்தனையோ கோடி ஆண்டுகளாகப் பரிணாம வளர்ச்சி பெற்ற உடலை, மூளையை ஓர் எந்திரம் கட்டுப்படுத்தும்போது என்ன ஆகும்? தானே சிந்தித்து நினைவுகளைச் சேமித்து அறிவைச் சேர்த்துக்கொண்டு வளர்கிற நம் மூளைகள் முழுக்க முழுக்க எந்திரத்தை நம்பி இயங்க ஆரம்பித்தால் அதன் செயல்பாடுகள் பலவீனமடையாதா? மனித மூளைகளில் வைக்கப்படவுள்ள இந்தச் சிப்களை ஒருவேளை அரசு கட்டுப்படுத்தினால்; ராணுவம் கட்டுப்படுத்தினால் என்னாகும்? நம்முடைய சுதந்திரத்தின் நிலை..?

இப்படி அடுக்கடுக்கான கேள்விகள் ஏராளமாக எழுகின்றன... ஆனால் இவை எதைப்பற்றியும் பெரிய கவலைகள் இன்றி நெறிமுறைகளோ கட்டுப்பாடுகளோ இல்லாமல் அமேசானும் டெஸ்லாவும் ஃபேஸ்புக்கும் இந்த மூளைவழித் தொழில்நுட்ப டைனோசர்களை உருவாக்க முண்டியடித்துக்கொண்டிருக்கிறார்கள். காரணம் அவர்களுடைய வியாபாரம் சிறக்க, நம் மூளைகள் தேவை. நம் மூளைகள்தான் அவர்களுக்கு மூலதனம்.

Mind control போலவே வளர்ந்துவரும் இன்னொரு துறை இருக்கிறது. அதற்குப் பேர் Brain hacking. அதிரவேண்டாம். நம் மூளைகள் எல்லாம் ஏற்கெனவே ஹேக் செய்யப்பட்டவைதான்...

எப்படி?

- காலம் கடப்போம்

அதிஷா - ஓவியம்: கோ.ராமமூர்த்தி