வாழ்க்கையோடு இரண்டறக் கலந்துவிட்டது இணையம். இ-மெயில் இல்லாமல் இன்று எந்த வணிகமும் இல்லை. உறவுப் பரிமாற்றம் தொடங்கி பணப்பரிமாற்றம் வரை எல்லாமே இ-மெயிலில்தான் நடக்கின்றன. அதேநேரம், இ-மெயில் முகவரியில் தேவையற்ற விளம்பர மெயில்கள் வந்து குவிகின்றன. அவற்றை நீக்குவதே பெரிய வேலையாக இருக்கிறது.

விகடனின் #DoubtOfCommonMan பகுதிக்கு சஞ்சீவி என்ற வாசகர் ஒரு கேள்வி அனுப்பியிருந்தார். ``என்னுடைய மின்னஞ்சலுக்குத் தேவையில்லாத முகவரியிலிருந்து தினமும் விளம்பர மெயில்கள் வருகின்றன. இதில் பாதிக்குமேல் எனக்குக் கொஞ்சமும் தொடர்பில்லாதவை. இவற்றைத் தடைசெய்ய ஏதாவது வழி இருக்கிறதா?" என்பதுதான் அவருடைய கேள்வி.

நிச்சயம் வழி இருக்கிறது. ஏதேனும் ஒரு குறிப்பிட்ட நிறுவனத்திடமிருந்து மட்டும் தொடர்ந்து மின்னஞ்சல்கள் வந்தால் அதன் `Mail List'-லிருந்து `Unsubscribe' செய்துகொள்ளலாம். ஆனால், நிறைய நிறுவனங்களிடமிருந்து மின்னஞ்சல்கள் வரும்பட்சத்தில், ஒவ்வொன்றாக இப்படிச் செய்வது கடினம். இதற்குப் பதிலாக `Unroll.me' என்ற தளத்திற்கு சென்று, நம் ஜிமெயிலை வைத்து லாகின் செய்தால், ஒட்டுமொத்தமாக இதுவரை எந்தெந்த நிறுவனங்களில் இருந்தெல்லாம் மின்னஞ்சல்கள் வருகின்றன என்பதை ஒரே இடத்தில் தெரிந்துகொள்ளலாம்.

உடனே அவற்றை அங்கேயே `Unsubscribe' செய்துவிடவும் முடியும். இதைச் செய்வதற்கு `Unroll' சேவையானது உங்கள் ஜிமெயில் தகவல்களைப் பயன்படுத்தும். அதை சில வணிக நோக்கங்களுக்காகவும் பயன்படுத்தும். இதைத் தெளிவாகவே குறிப்பிட்டுவிடுகிறது `Unroll me'. இது தொடராமல் இருக்க வேண்டும் என்றால், ஒருமுறை `Unroll me'-ல் மின்னஞ்சல்களை `Unsubscribe' செய்துவிட்டு, உங்கள் ஜிமெயிலின் `Third-party apps with account access' பகுதிக்குச் சென்று `Unroll me'-க்கான Access-ஐ நீக்கிவிடலாம்."