Published:Updated:

கேட்ஜெட் கிளாஸ் ரூம்! - 12 - லேப்டாப் வாங்கப்போறீங்களா?

லேப்டாப்பில் கவனிக்க வேண்டிய விஷயங்கள்...

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

பிரீமியம் ஸ்டோரி
லாக்டெளனில் அதிகம் விற்கப்பட்ட கேட்ஜெட்களில் ஒன்று லேப்டாப். இதுவரை தேவைப்படாதவர்களுக்குக்கூட லேப்டாப் இப்போது அவசியமாகியிருக்கிறது. எது நல்ல லேப்டாப் என்ற கேள்விக்கான பதில் உங்கள் தேவையைப் பொறுத்தது என்றுதான் சொல்ல முடியும். இருந்தாலும், லேப்டாப் வாங்கும்போது எவற்றையெல்லாம் முக்கியமாகக் கவனிக்க வேண்டுமென்பதைப் பார்க்கலாம்.
கேட்ஜெட் கிளாஸ் ரூம்! - 12 - லேப்டாப் வாங்கப்போறீங்களா?

முதலில் பொதுவான விஷயங்கள்...

லேப்டாப் உங்கள் தேவைக்கு மட்டுமா அல்லது குடும்ப உறுப்பினர்களும் பயன்படுத்துவார்களா... குடும்ப உறுப்பினர்களும் பயன்படுத்துவார்கள் என்றால் அவர்களின் தேவைகளையும் பட்டியிலிட்டுக் கொள்ளுங்கள்.

குழந்தைகளும் பயன்படுத்துவார்களா... அப்படி யென்றால் மிக மெல்லிய, பிளாஸ்டிக் பாடியிலான லேப்டாப் சரிவராது.

விரைவிலேயே லேப்டாப்பை மாற்றும் எண்ணம் இருக்கிறதா... இல்லையென்றால் இப்போதே கொஞ்சம் கூடுதல் செலவானாலும் அப்டேட்டடு மாடல் வாங்கிவிடலாம்.

இது உங்கள் பெர்சனல் தேவைக்கா அல்லது அலுவலக வேலைக்கும் சேர்த்தா... அலுவலகத் தேவைக்கென்றால் எல்லா மென்பொருள்களையும் (சாஃப்ட்வேர்) பணம் தந்து வாங்க வேண்டியிருக்கும். விலை குறைவாக இருக்கிறதென லைசென்ஸ் இல்லாத ஆபரேட்டிங் சாஃப்ட்வேர், மென்பொருள்களை இன்ஸ்டால் செய்துவிட்டால் அது பின்னர் சிக்கல் தர வாய்ப்புகள் அதிகம்.

கேட்ஜெட் கிளாஸ் ரூம்! - 12 - லேப்டாப் வாங்கப்போறீங்களா?

திரை

லேப்டாப்பை தினமும் அலுவலகம் கொண்டு செல்கிறவர்களுக்கு எடை மிக முக்கியம். அதற்குத் திரையின் அளவு முக்கிய காரணம். வீட்டில்தான் பெரும்பாலும் இருக்கும் என்றால் கொஞ்சம் பெரிய அளவிலான லேப்டாப்பைப் பரிசீலிக்கலாம். படம் பார்க்கவும் லேப்டாப்தான் என்பவர்கள் 15 இன்ச் வரை வாங்கலாம். மற்றவர்களுக்கு 14 இன்ச் போதும். எடை குறைவாக வேண்டுமென்பவர்கள் 12 இன்ச் லேப்டாப்பைப் பாருங்கள். திரையில் இன்னொரு விஷயம் டச் ஸ்க்ரீன். பெரும்பாலும் டைப்பிங் கிடையாது; க்ளிக் வேலைதான் என்பவர்களுக்கு இது நல்ல மாடல். விலை அதிகம். கொஞ்சம் கூடுதல் கவனத்துடன் பார்த்துக்கொள்ள வேண்டியிருக்கும்.

கேட்ஜெட் கிளாஸ் ரூம்! - 12 - லேப்டாப் வாங்கப்போறீங்களா?

ரேம் & பிராசஸர் (Ram & Processor)

சிலருக்கு அலுவலக வேலைகளுக்காகத் தனிப்பட்ட மென்பொருள்களை இன்ஸ்டால் செய்ய வேண்டியிருக்கும். சிலருக்கு கேமிங்கில் விருப்பமிருக்கும். அப்படி ஸ்பெஷல் சாஃப்ட்வேர் வேண்டுமென்பவர்கள் அதற்கு எவ்வளவு ரேம் மற்றும் பிராசஸர் இருந்தால் நல்லது என்பதைத் தெரிந்து கொண்டு அதற்கேற்ற மாடல்களைத் தேர்வு செய்ய வேண்டும். இல்லையேல், லேப்டாப் கைக்கு வந்தும் வேண்டிய வேலையைச் செய்ய முடியாமல் போகும். பொதுவான தேவைகளுக்கு 4 ஜிபி ரேமும் i3 பிராசஸரும் போதும்.

கேட்ஜெட் கிளாஸ் ரூம்! - 12 - லேப்டாப் வாங்கப்போறீங்களா?

பேட்டரி திறன்

சிலருக்கு நாள் முழுவதும் வெளியில் சுற்றும் வேலை இருக்கும். சிலருக்கு சீட்டை விட்டு எழுந்திருக்கவே தேவையிருக்காது. இருவருக்குமான பேட்டரி திறன் தேவையில் நிறைய வித்தியாசங்கள் இருக்கும். பேட்டரி திறன் அதிகரிக்கும்போது எடையும் கூடும். சில லேப்டாப்பில் ஃபாஸ்ட் சார்ஜிங் வசதியும் உண்டு. எல்லாவற்றையும் கணக்கிலெடுத்து நமக்கான பேட்டரி திறன்கொண்ட லேப்டாப்பைத் தேர்ந்தெடுக்க வேண்டும்.

கேட்ஜெட் கிளாஸ் ரூம்! - 12 - லேப்டாப் வாங்கப்போறீங்களா?

HDMI, USB Ports

சில லேப்டாப்களில் ஒன்று அல்லது இரண்டு யு.எஸ்.பி போர்ட்கள் மட்டுமே இருக்கும். நாம் பயன்படுத்தும் துணை கேட்ஜெட்களைப் பொறுத்து அதன் எண்ணிக்கை அதிகம் தேவைப்படும். சில சிறிய லேப்டாப்களில் HDMI போர்ட்டே இருக்காது. அதற்காகத் தனியே கனெக்டர் வாங்க வேண்டியிருக்கும். அதன் தரமும் சந்தேகத்துக்குரியதே. எனவே, உங்களுக்கு எத்தனை போர்ட்கள் தேவை என்பதை வைத்து லேப்டாப்பை முடிவு செய்யுங்கள். இவை தவிர, அந்த பிராண்டின் சர்வீஸ் எப்படி, எத்தனை நாள்களில் டெலிவரி ஆகும், கடைக்கு நேராகச் சென்று வாங்குவதென்றால் அவர்களே சர்வீஸ் செய்வார்களா உள்ளிட்ட பல விஷயங்களை லேப்டாப் வாங்கும் முன் கவனிக்க வேண்டும்.

பலர், தங்களுக்குத் தெரிந்தவர்களிடம் உதவி கேட்டு அவர்கள் சொல்லும் மாடலை வாங்குவதுண்டு. அந்த மாடல் பின்னர் பிரச்னை தந்தால், உதவி செய்தவருடன் சண்டையே போடுவார்கள். ஒரு விஷயத்தை நினைவில் கொள்ளுங்கள். மின்னணுச் சாதனங்கள் பிரச்னை கொடுப்பது தவிர்க்க முடியாதது. அதனால்தான், சர்வீஸ் நன்றாக இருக்கும் பிராண்டுகள் விலை அதிகமாக இருந்தாலும் நன்றாக விற்கும். நமக்கு அந்த கேட்ஜெட் பற்றிய அறிவு இருந்தால் நாமே சிலவற்றைச் சரி செய்துகொள்ளலாம். இல்லாதவர்கள் சர்வீஸ் சென்டரையே நாட வேண்டியிருக்கும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு