Published:Updated:

`கேமரா இருக்கு... ஆனா இல்ல!' - அது என்ன அண்டர்-டிஸ்ப்ளே கேமரா?

அண்டர்-டிஸ்ப்ளே கேமரா தொழில்நுட்பம்
அண்டர்-டிஸ்ப்ளே கேமரா தொழில்நுட்பம் ( Xiaomi )

இறுதியாக இப்போது ஷாவ்மி, அடுத்த வருடமே இந்த தொழில்நுட்பத்தை பயன்படுத்தும் ஸ்மார்ட்போன்களை சந்தைக்கு எடுத்துவருவோம் என அறிவித்திருக்கிறது.

'இதுக்கு மேல என்னத்த அப்டேட் பண்றது?' ஸ்மார்ட்போன் நிறுவனங்கள் பலவற்றின் மைண்ட்வாய்ஸ் இதுவாகதான் இருக்கிறது. கடந்த பத்து வருடங்களில் ஸ்மார்ட்போன்கள் பரபரவென மாறியிருக்கின்றன, பல மடங்கு மேம்பட்டிருக்கின்றன. 'There's always room for improvement' என சொல்வர்கள். அப்படி எவ்வளவு மேம்பட்டாலும் முன்னேற்றத்திற்கான வாய்ப்புகள் எப்போதுமே இருக்கும். அந்த வாய்ப்புகளை தேடிப் பிடித்துகொண்டிருக்கின்றன ஸ்மார்ட்போன் நிறுவனங்கள்.

இன்று ஸ்மார்ட்போன்தான் பலருக்கும் கேம், படம், சீரிஸ் என அனைத்திற்குமான ஸ்க்ரீன். இதனால் இன்று ஸ்மார்ட்போன் ஒன்றில் அதிக டிஸ்ப்ளே ஏரியாவை எதிர்பார்க்கின்றனர் மக்கள். கடந்த சில ஆண்டுகளாகவே இதை இலக்காக வைத்து பல விஷயங்கள் ஸ்மார்ட்போன்களில் மேம்பட்டிருக்கின்றன மாறியிருக்கின்றன. முன்பெல்லாம் 5 இன்ச் டிஸ்ப்ளேவை பார்த்தே 'என்ன கொஞ்சம் பெருசா இருக்குற மாதிரி இருக்கே' எனச் சொல்லுவோம். இன்று 6.6 இன்ச் டிஸ்ப்ளேவை நார்மல் என சொல்கிறோம். சின்ன டிஸ்ப்ளேக்களை ஸ்மார்ட்போன்களில் பார்ப்பதே அரிதாகிவிட்டது. மக்களின் மொபைல் டிஸ்ப்ளேக்கள் திரையரங்க ஸ்க்ரீன்களுக்கு நிகரானவையாக மாறியதுதான் இதற்கு காரணம். ஆனால், என்னதான் பெரிய டிஸ்ப்ளே கொடுத்தாலும் முழு டிஸ்ப்ளே அனுபவத்தை கொடுப்பதில் சிக்கல்களை சந்தித்தன நிறுவனங்கள்.

அதில் பெரும் சவால் முன்னாலிருக்கும் செல்ஃபி கேமரா. இன்றைய டிக் டாக், செல்ஃபி யுகத்தில் இதை மொத்தமாக எடுத்துவிடவும் முடியாது. இதனால் அவற்றுக்கு மட்டும் இடம் விட்டு விதவிதமான நாட்ச் டிஸ்ப்ளேக்கள் வெளிவந்தன. பின்பு அதுவும் இருக்கக் கூடாது என தேவைப்படும்போது மட்டும் வெளியே வரும் பாப்-அப் செல்ஃபி கேமராக்கள் கடந்த வருடம் சில போன்களில் கொடுக்கப்பட்டன. ஆனால் அது அனைத்து போன்களிலும் கொடுக்கும் அளவுக்குப் பிரபலமாகவில்லை.

இதில் ஒரு படி மேலே சென்று அண்டர்-டிஸ்ப்ளே கேமராக்களை தருவதில் தீவிரமாக களமிறங்கின நிறுவனங்கள். அதாவது டிஸ்ப்ளேவின் அடியிலேயே செல்ஃபி கேமரா இருக்கும். வெளியிலிருந்து பார்த்தால் கேமரா இருப்பதே தெரியாது

இதனால் முழு ஏரியாவும் டிஸ்ப்ளேவுக்கு கிடைக்கும். இந்த தொழில்நுட்பத்தை கடந்த வருடம் ஒப்போ, ஷாவ்மி என இரு நிறுவனங்களுமே ஒரு சாம்பிள் வீடியோ கொண்டு உலகத்திற்கு காட்டின. ஆனால் அதன் பின் எந்த ஒரு அறிவிப்பும் இல்லாமலேயே இருந்தது.

இறுதியாக இப்போது ஷாவ்மி, அடுத்த வருடமே இந்த தொழில்நுட்பத்தை பயன்படுத்தும் ஸ்மார்ட்போன்களை சந்தைக்கு எடுத்துவருவோம் என அறிவித்திருக்கிறது. இந்த தொழில்நுட்பத்தை எடுத்துக்காட்டும் வீடியோ ஒன்றையும் வெளியிட்டிருக்கிறது அந்நிறுவனம். ஷாவ்மி அறிக்கையின்படி இது அண்டர்-டிஸ்ப்ளே தொழில்நுட்பத்தின் மூன்றாம் தலைமுறை. முதல் தலைமுறை வெளியே காட்சிப்படுத்தப்படவில்லை. இரண்டாம் தலைமுறைதான் கடந்த ஆண்டு வெளிவந்த வீடியோக்களில் இடம்பெற்றன. ஆனால் அதை மக்கள் பயன்பாட்டுக்கு எடுத்துவருவதில் சிக்கல்கள் இருந்தன. இப்போது கிட்டத்தட்ட அனைத்து சிக்கல்களையும் தீர்த்து மார்க்கெட் ரெடியாக இருக்கிறதாம் இந்த மூன்றாம் தலைமுறை அண்டர்-டிஸ்ப்ளே தொழில்நுட்பம்.

மூன்றாம் தலைமுறை அண்டர்-டிஸ்ப்ளே கேமரா தொழில்நுட்பம்
மூன்றாம் தலைமுறை அண்டர்-டிஸ்ப்ளே கேமரா தொழில்நுட்பம்
Xiaomi

இன்னும் சில ஆண்டுகளில் ஸ்மார்ட்போன்களில் இது சாதாரணமான ஒரு விஷயமாகக்கூட மாறக்கூடும்!

இந்த தொழில்நுட்பம் பற்றி நீங்கள் என்ன நினைக்கிறீர்கள்... கமென்ட்களில் பதிவிடுங்கள்!
அடுத்த கட்டுரைக்கு