மனிதர்களின் அன்றாட வாழ்க்கையில் ஸ்மார்ட்போன்கள் இன்றியமையாத ஒரு பொருளாகவே மாற்றிவிட்டது. அதிக விலையிலான ஸ்மார்ட்போன்களை வாங்கி பலரும் பயன்படுத்தி வருகின்றனர். அப்படி அதிக விலை கொடுத்து வாங்கும் ஸ்மார்ட்போன்கள் தொலைந்து விட்டாலோ அல்லது திருடு போனாலோ இனி பதற்றம் அடைய வேண்டாம்.

தொலைந்த அல்லது திருடு போன செல்போன்களைக் கண்டுபிடிக்க புதிய தொழில்நுட்பம் ஒன்றை மத்திய அரசு நாளை அறிமுகம் செய்யவுள்ளது. ‘சஞ்சார் சாத்தி’ (Sanchar Saathi) என்று பெயரிடப்பட்டுள்ள தொழில்நுட்ப போர்டலின் மூலம் செல்போனின் IMEI நம்பரைப் பயன்படுத்தித் தொலைந்துபோன அந்த ஸ்மார்ட்போனை இந்தியாவின் எந்த மூலையிலிருந்தாலும் கண்டுபிடித்து விடலாம் என்று கூறப்படுகிறது.
இந்த போர்டலுக்குள் சென்று போன் நம்பர், மொபைலின் IMEI நம்பர், போன் மாடல் காணாமல் போன பகுதி குறித்த விவரம், காவல் நிலையத்தில் அளிக்கப்பட்ட புகாரின் புகார் எண் மற்றும் அதன் ஸ்கேன் செய்யப்பட்ட காப்பி ஆகியவற்றைச் சமர்ப்பிக்க வேண்டும். அதன்பின் மொபைல் எண்ணுக்கு வரும் OTP-ஐ உள்ளீடு செய்து சமர்ப்பித்தால் ஸ்மார்ட்போன் எங்கிருந்தாலும் அதை ப்ளாக் செய்வதோடு மட்டுமல்லாமல், எங்கு உள்ளது என்பதையும் கண்டறிய முடியும்.

இந்தப் புதிய தொழில்நுட்ப நடைமுறை டெல்லி, மும்பை உள்ளிட்ட குறிப்பிட்ட சில நகரங்களில் ஏற்கெனவே அறிமுகப்படுத்தப்பட்டுப் பரிசோதிக்கப்பட்டது. இந்நிலையில் உலகத் தொலைத்தொடர்பு மற்றும் தகவல் சமூக தினத்தை முன்னிட்டு மத்திய தொலைத்தொடர்பு அமைச்சர் அஸ்வினி வைஷ்ணவ் நாளை (மே 17 ஆம் தேதி இதை நாடெங்கும் அறிமுகப்படுத்தவுள்ளார்.