செல்போன் விஷயத்தில் இனி இளைஞர்களைப் பிடித்து ஆட்டப்போவது, 'ஆப் ஜுரம்'தான் என்று கணிக்கின்றன மொபைல் போன் நிறுவனங்கள்! ஆப்பிள் நிறுவன ஐ-போன், ஐ-பாட் உபயோகிப்பாளர்கள் டவுன்லோட் செய்துகொள்ள ஆரம்பிக்கப்பட்டு இருக்கும் ஆன்லைன் களஞ்சியமே ஆப் ஸ்டோர்(App Store). லட்சக்கணக்குகளில் பாடல்கள், ஆயிரக்கணக்கில் கேம்ஸ், டிவிட்டர், ஃபேஸ்புக் போன்ற சமூக வளைதளங்கள், பத்திரிகைகள், என்சைக்ளோபீடியாக்கள், இ-புக்ஸ் என செல்போன் ஒரு சூப்பர் மார்க்கெட் போல இருக்கும். ஆப் ஸ்டோர் என்ற இந்த வசதியை ஒவ்வொரு நிறுவனமும் கொண்டு வரத் தொடங்கிவிட்டது. நோக்கியா அறிமுகப்படுத்தி இருக்கும் ஆப் ஸ்டோருக்குப் பெயர் ஓவி (ovi).

பரம்பரைப் பங்காளிகளான வட கொரியாவுக்கும் தென் கொரியாவுக்கும் இடையே பல வருட யுத்தம். தென் கொரியாவில் இருப்பவர்களுடன் எந்த வகையில் தொடர்புகொண்டாலும் அவர்களுக்கு மரண தண்டனையோ அல்லது ஆயுள் தண்டனையோ விதிக்கப்படும் எனச் சட்டம் இயற்றி இருக்கிறது வட கொரியா. இந்நிலையில், தென் கொரியாவில் உள்ள தனது நண்பனுடன் வட கொரியாவைச் சேர்ந்த ஜங் என்ற வாலிபர் செல்போனில் பேசினார். விளைவு, அவரது 'குற்றத்துக்கு' துப்பாக்கியால் சுட்டு மரண தண்டனையை நிறைவேற்றிவிட்டார்கள்!

மக்களைக் கதிகலங்கச் செய்யும் குண்டுவெடிப்புச் சம்பவங்கள் மற்றும் நச்சு வாயுத் தாக்குதல்களில் இருந்து மக்களைக் காப்பாற்ற வந்திருக்கின்றன நவீன மோப்பம் பிடிக்கும் செல்போன்கள். எலெக்ட்ரானிக் மூக்கு (Electranic Nose) எனப்படும் நவீன உணர் கருவியைத் தயாரித்து இருக்கிறது அமெரிக்காவின் ஹோம்லேண்ட் செக்யூரிட்டி சயின்ஸ் அண்ட் டெக்னாலஜி நிறுவனம். இது தயாரித்து இருக்கும் 'செல் ஆல்' என்ற நவீன சென்சார் கருவியை செல்போனில் பொருத்திக்கொண்டால்

காற்றில் நச்சு ஆபத்துக்கள் இருந்தால் எச்சரிக்கும். தீமை விளைவிக்கும் குளோரின் போன்ற விஷ வாயுக்கள் இருந்தால் ஒலி எழுப்பும். அதிக நச்சுத்தன்மையை உணர்ந்தால் பலமாக ஓசை எழுப்பி சுற்றி இருப்பவர்களையும் உஷார்படுத்தும். அத்துடன் எந்த இடத்தில் நச்சு வாயு இருக்கிறது என்ற தகவலை அவசர உதவி மையத்துக்கும் அனுப்பிவைக்கும். ஒரு அமெரிக்க டாலருக்கும் குறைவான விலையுள்ள இந்தக் கருவி, விரைவில் சந்தைக்கு வரப் போகிறது!