சைபர் குற்றங்களில் இணையத்துக்கு அடுத்த இடம் வகிப்பது செல்போன் குற்றங்கள்! அதிலிருந்து நம்மை தற்காத்துக்கொள்வது எப்படி?

முகம் தெரியாத யாரோ ஒருவர் உங்கள் எண்ணுக்கு அழைத்து மிரட்டினாலோ ஆபாசமாகப் பேசினாலோ அது செல்போன் வன்முறைக்குக் கீழ் வரும். தொடர்ந்து அதுபோன்ற அழைப்புகள் வந்தால் முதலில் உங்கள் சர்வீஸ் புரொவைடரிடம் புகார் செய்யுங்கள். அதன் பிறகும், அப்படிப்பட்ட அழைப்புகள் வந்தால் போலீஸில் புகார் அளிக்கலாம்!

சில சமயங்களில் தவறுதலாக அழைத்த மர்ம நபர் உங்கள் எண் எதுவெனக் கேட்கலாம். அப்படிக் கேட்டால் சொல்லாதீர்கள். மிரட்டிக்கூடக் கேட்பார்கள். அப்படியும் சொல்லாதீர்கள். பதிலாக, அவர் எந்த எண்ணை அழைத்தார் என்று விசாரிக்கவும். அவர் அது, இது என்று டபாய்த்தால்... உஷார்!

அது போன்ற சமயங்களில், நீங்கள் கோபப்பட்டாலோ அல்லது திருப்பிப் பதில் அளித்தாலோ... அது எரிகிற தீயில் நெய்யை வார்த்தது போலாகிவிடும். அதனால், அதுபோன்ற அழைப்புக்களைத் தொடர்ந்து நிராகரித்துவிட்டு அமைதியாக இருங்கள். தானாகவே அடங்கிவிடும் எதிர்பார்ட்டி!

இந்தச் சுமுக வழியும் தீர்வைத் தரவில்லை என்றால், உங்கள் செல்லின் வாய்ஸ் மெசேஜில் பின்வருமாறு ஒரு மெசேஜ் போட்டுவிடவும். 'உங்கள் அழைப்பை தற்போது ஏற்க இயலாது. ஆகவே, நீங்கள் சொல்ல வருவதை பீப் ஒலிக்குப் பிறகு ரெக்கார்ட் செய்யவும். இல்லை எனில், இது தொந்தரவு தரும் அழைப்பாகக் கருதப்பட்டு உங்கள் எண் கண்காணிக்கப்படும்!' இது நிச்சயம் உங்களுக்குப் பலன் அளிக்கும் யோசனை என்கிறார்கள் செல்போன் சேவை வழங்குபவர்கள்!

பல டெலி மார்க்கெட்டிங் நிறுவனங்கள் 'Predictive Dialing' என்ற தொழில்நுட்பத்தைப் பயன்படுத்துகின்றன. அதாவது, அந்த நிறுவனங்களில் உள்ள சேல்ஸ் ரெப்கள் உங்கள் எண்ணை கம்ப்யூட்டருடன் இணைத்துவிடுவார்கள். அவை

தானாகவே உங்கள் எண்ணை அழைக்கும். நீங்கள் அதை அட்டென்ட் செய்யும் நேரத்தில், சேல்ஸ் ரெப் அந்த இடத்தில் இருந்தால் உங்களுக்குப் பதிலளிப்பார். இல்லை என்றால், எதிர்ப்புறம் அமைதியாக இருப்பதை நீங்கள் உணர முடியும். இந்த வகை அழைப்புகளை 'abandoned calls' என்று வகைப்படுத்துவார்கள். தொடர்ந்து இத்தகைய அழைப்புகள் வந்தால், அந்த நிறுவனத்தின் மீது புகார் அளிக்கலாம்.

உலக சுகாதார மையத்தின் கணக்குப்படி இந்தியாவில் 545 மில்லியன் செல்போன் இணைப்புகள் இருக்கின்றனவாம். ஆனால், 366 மில்லியன் மக்கள் மட்டுமே சுகாதாரமான வாழ்க்கையைப் பெற முடிகிறது. ஆம் நண்பர்களே... கழிவறைகளைவிட செல்போன் கடைகள்தான் நம் தேசத்தில் அதிகம்!