Published:Updated:

கேட்ஜெட் கிளாஸ் ரூம்! 6 - வாட்ஸ்அப் விதிமுறைகள்

ஒருவர் ஆன்லைனில் இருப்பதாலேயே உங்களுடன் பேச நேரம் இருப்பதாக நினைக்க வேண்டாம்

பிரீமியம் ஸ்டோரி

கடந்த சில வாரங்களாக வாட்ஸ்அப் பற்றிதான் உலகம் அதிகம் விவாதித்துக்கொண்டிருக்கிறது. வாட்ஸ்அப் நம் தகவல்களை எப்படிப் பயன்படுத்துகிறது என்பது ஒருபக்கம் இருக்கட்டும். நாம் வாட்ஸ்அப்பை எப்படிப் பயன்படுத்திக்கொண்டிருக்கிறோம்?

ஸ்மார்ட்டாகப் பயன்படுத்த வேண்டுமில்லையா... இப்படித் தான் பயன்படுத்த வேண்டுமென எழுதப்பட்ட விதிகள் இல்லை யென்றாலும், சில விஷயங்களை ஸ்மார்ட்டா, இல்லையா என்று பிரித்துப் பார்க்க வேண்டியிருக்கிறது. ஆரம்பிக்கலாமா..?

டி.பி எனப்படும் `டிஸ்ப்ளே பிக்சர்'தான் முதல் பாடம். மற்றவர் களின் டிபியை நாம் பார்க்கலாம் என்பதற்காக அதை டௌன்லோடு செய்து நம் விருப்பப்படி பயன்படுத்தக் கூடாது. அது நிச்சயம் தவறு.

நண்பர்கள் குரூப்பும் ஃபேமிலி குரூப்பும் அலுவலக குரூப்பும் ஒன்று கிடையாது. அதனால் எமோஜி, ஸ்டிக்கர், ஜிஃப் பைல்களைப் பயன்படுத்துவதில் கூடுதல் கவனமாக இருங்கள். எந்த குரூப்பில் யார் இருக்கிறார் என்பதை அறிந்து அதற்கேற்ப உரையாடுங்கள். மெசேஜ் அனுப்புபவர் அல்லது குரூப்பின் தன்மை அறிந்து அதற் கேற்ப உங்கள் பதில்கள் இருக்கும்படி பார்த்துக்கொள்ளவும்.

அதுமட்டுமல்ல, பொதுவாகவே காலை வணக்கம் போன்ற வற்றைத் தவிர்ப்பது நல்லது.

ஒருவர் ஆன்லைனில் இருப்பதாலேயே உங்களுடன் பேச நேரம் இருப்பதாக நினைக்க வேண்டாம். உங்கள் மெசேஜை பார்த்துவிட்டு, பதில் அனுப்பாமல் இருக்கவும் ஆயிரம் காரணங்கள் இருக்கலாம். எனவே, அடிக்கடி மெசேஜ் அனுப்பி தொல்லை செய்யாதிருங்கள். ப்ளூ டிக்கினால் நிறைய சண்டைகள் அன்றாடம் நிகழ்ந்து கொண்டிருக்கின்றன.

குரூப்பில் யாரை வேண்டுமானாலும் சேர்க்க வசதி இருக்கிறதுதான். அதற்காக அவர்களைக் கேட்காமலே குரூப்பில் சேர்க்க வேண்டும் என்ற அவசியம் இல்லை. அது ஸ்மார்ட் மூவும் இல்லை. தனி மெசேஜில் அவரிடம் கேட்டுவிட்டுச் சேர்த்தால் பல சங்கடங்களைத் தவிர்க்கலாம். பலரின் மொபைல் எண் பிறருக்குத் தெரியக் கூடாது. குறிப்பாக, பிரபலங்களின் எண்கள். எனவே, அவர்களை பொதுவான குரூப்பில் சேர்த்துச் சங்கடப் படுத்த வேண்டாம்.

கேட்ஜெட் கிளாஸ் ரூம்! 6 - வாட்ஸ்அப் விதிமுறைகள்

ஃபார்வர்டு மெசேஜ் வந்தால் அதைப் படிக்கலாம். அது குறித்துச் சிந்திக்கலாம். உடனடியாக இன்னும் பல குரூப்களுக்கு நாமும் ஃபார்வர்டு செய்தேயாக வேண்டுமென்ற கட்டாயம் கிடையாது. நீங்கள் அனுப்பும் ஃபார்வர்டு மெசேஜ்களுக்கு குரூப்பில் யாரும் ரிப்ளை செய்ய வில்லையென்றாலே அவை யாருக்கும் பயன் தரவில்லை என்பதைத் தெரிந்துகொள்ளுங்கள். அவற்றைத் தவிருங்கள்.

நமக்கு வரும் ஃபார்வர்டுகள் எல்லாமே உண்மையாக இருப்பதில்லை. சொல்லப்போனால் 90 சதவிகிதம் ஃபார்வர்டுகள் பொய்யானவைதான். அவற்றின் நம்பகத்தன்மை, அவை உருவாக்கப்பட்ட காலம் எல்லாம் தெரியாமல் ஏன் அனுப்ப வேண்டும்? சிலர், ‘உண்மையான்னு தெரியல’ என்ற குறிப்போடு ஃபார்வர்டு செய்வார்கள். உண்மையா எனத் தெரியாமல் ஏன் அனுப்ப வேண்டும்?

எல்லோருடைய வீட்டிலும் வைஃபை வசதி இருப்பதில்லை. மொபைல் டேட்டா குறிப்பிட்ட அளவே தினமும் கிடைக்கலாம். எனவே, எந்த வீடியோக்களை அனுப்புகிறோம் என்பதை யோசித்துக்கொள்ளுங்கள்.

நீங்கள் வாட்ஸ்அப்பில் அனுப்பும் ஒவ்வொரு மெசேஜும் உங்களின் ஓர் அங்கம். அதை ஸ்மார்ட்டாகப் பார்த்துக்கொள்ள வேண்டியது உங்கள் கடமை. காரணம், நீங்கள் ஸ்மார்ட்டானவர் இல்லையா?

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு