Published:Updated:

இது `மார்க்' கணக்கு!

ஃபேஸ்புக் தனது அடுத்த சாம்ராஜ்யத்தை நிறுவ முதல் படியை எடுத்து வைத்திருக்கிறது. இந்த முறை அவர்கள் வைத்திருக்கும் குறி நிதித்துறை.

பிரீமியம் ஸ்டோரி

உலகம் முழுவதும் மொபைல் வைத்திருப்பவர்களின் எண்ணிக்கை வங்கிக் கணக்கு வைத்திருப்பவர்களின் எண்ணிக்கையைவிட அதிகம். மார்க் சக்கர்பெர்க் கூற்றுப்படி உலகில் 100 கோடி பேரிடம் மொபைலிருக்கிறது; ஆனால், வங்கிக் கணக்கு இல்லை. இவர்களுக்குப் பணப்பரிவர்த்தனைகளில் உதவ ஃபேஸ்புக் முடிவு செய்திருக்கிறது. அதற்காக உருவாக்கப்பட்டிருப்பதுதான் `லிப்ரா’.

லிப்ரா என்பது பிளாக்செயின் டெக்னாலஜியின் அடிப்படையில் இயங்கும் ஒரு க்ரிப்டோகரன்ஸி. இதற்கு உருவமோ வடிவமோ கிடையாது.

டிஜிட்டலாக மட்டுமே இருக்கும், இயங்கும் ஒரு கரன்ஸி. பணத்தைக் கையிலெடுத்துச் செல்வது எப்போதுமே ஆபத்தானது; பாதுகாப்பற்றது. அதை மொபைல் மூலம் பாதுகாப்பான முறையில் எடுத்துச் செல்ல உதவுவதுதான் டிஜிட்டல் கரன்ஸி. மேலும், வங்கிகள் அதன் சேவைகளுக்காகக் கேட்கும் தொகையும் அதிகம். குறிப்பாக, சர்வதேச அளவிலான பரிவர்த்தனைகளுக்கு அதிக செலவு ஆகும். இதைக் குறைப்பதற்காகவும், வங்கிகளுக்கான வாய்ப்பே இல்லாதவர்களுக்காகவும் லிப்ரா உருவாக்கப்படுவதாக தனது ஃபேஸ்புக் பதிவில் குறிப்பிட்டிருக்கிறார் மார்க் சக்கர்பெர்க்.

libra
libra

லிப்ரா பற்றி மேலும் தெரிந்துகொள்ளும் முன் பிளாக் செயின் பற்றி கொஞ்சம் பார்த்துவிடலாம். இணைய உலகில் எல்லாமே `சென்ட்ரலைஸ்டு’ செய்யப்பட்டவை. ஒரு வங்கியில் உங்களுக்குக் கணக்கு இருக்கிறது. அந்த வங்கிக்கு என ஒரு சென்ட்ரலைஸ்டு டேட்டா சென்டர் இருக்கும். அங்குதான் உங்கள் கணக்கில் நடக்கும் அத்தனை விஷயங்களும் சேமிக்கப்படும். இப்போது, உங்கள் கார்டை ஒரு சூப்பர் மார்க்கெட்டில் பயன்படுத்தினால், அந்த மெஷின் நேராக வங்கியின் டேட்டா சென்டரைத் தொடர்புகொள்ளும். உங்கள் கணக்கில் போதுமான தொகை இருக்கிறதா என்பதைப் பார்க்கும். இருந்தால், அந்தப் பணத்தைத் தனது அக்கவுன்ட்டுக்கு மாற்றிக்கொள்ளும்! இதற்கு அனுமதி வேண்டுமில்லையா? அதுதான் உங்கள் பாஸ்வேர்டு.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

ஓர் எளிமையான உதாரணத்தைப் பார்க்கலாம். ஒரு ரயில் இன்ஜின் இருக்கிறது. அந்த இன்ஜினின் நிழல் இந்த பிளாக் செயினில் இருக்கும் அனைவரிடத்திலும் இருக்கிறது. இப்போது இன்ஜினுக்குப் பின்னால் ஒரு பெட்டியைச் சேர்த்தால், அது அனைத்து நிழலிலும் தொடரும். பெட்டிக்குப் பின் பெட்டி எனச் சேர்த்துக்கொண்டே செல்லலாம். அது அந்த நெட்வொர்க்கில் இருக்கும் அனைவரது பிரதியிலும் சேரும். இதுதான் பிளாக் செயின் முறை. இந்தப் பெட்டிக்கு ஒரு பாதுகாப்பு வேண்டாமா? அதுதான் க்ரிப்டோகிராஃபி.

ஃபேஸ்புக் லிப்ரா
ஃபேஸ்புக் லிப்ரா
Facebook

க்ரிப்டோகிராஃபியில் ஒவ்வொரு பயனருக்கும் பப்ளிக் கீ மற்றும் பிரைவேட் கீ என இரண்டு விஷயங்கள் உண்டு. என்னுடைய பப்ளிக் கீயை உங்களுக்குத் தருகிறேன் என்றால், அதை வைத்து என்னுடைய பெட்டியைத் திறந்து நீங்கள் சேர்க்க நினைக்கும் தகவலைச் சேர்க்கலாம். என்னுடைய பிரைவேட் கீயை வைத்து அந்தப் பெட்டியைத் திறந்தால் மட்டுமே அந்தத் தகவல் தெரியும். ஆக, பப்ளிக் கீ என்பது எல்லோருக்கும் தெரிந்த ஒன்று. பிரைவேட் கீ என்பது அவரவர்க்கு மட்டுமே ஆன பாஸ்வேர்டு.

இப்போது ரயில் உதாரணத்துக்கு வருவோம். இன்ஜினுக்குப் பின் புதிதாக ஒரு பெட்டியைச் சேர்க்க அந்தப் பெட்டியின் உரிமையாளரின் பப்ளிக் கீயும் கொஞ்சம் கணினி வேலையும் தேவை. எத்தனை பெட்டிகள் சேர்க்கப்படுகிறதோ, அதில் உலகம் முழுக்க இருக்கும் பயனர்களின் நிழல் ரயிலும் சேர்ந்துவிடும். புதியதொரு என்ட்ரி உருவாக்கப்படுகிறது என்றால், புதிய பிளாக் தயாராகிவிட்டது. இப்படிப் புதிய பிளாக்குகளை உருவாக்குபவர்களை மைனர்ஸ்(Miners) என்கிறார்கள். இந்த பிளாக் செயினில் நடக்கும் எந்தப் பரிவர்த்தனையையும் யாரும் மறைக்க முடியாது.

Facebook Libra
Facebook Libra
Facebook

இந்த அடிப்படையில்தான் பிட்காயின் உள்ளிட்ட உலகிலிருக்கும் அத்தனை க்ரிப்டோகரன்ஸிக்களும் இயங்குகின்றன. இதில் புதிதாக ஒரு பிளாக் உருவாக்கும் வாய்ப்பு அனைவருக்கும் உண்டு. லிப்ராவும் பிளாக்செயின் முறையில் இயங்கினாலும் இதில் புதிதாக பிளாக் உருவாக்கும் வாய்ப்பு எல்லோருக்கும் கிடையாது. குறிப்பிட்ட சில நிறுவனங்களுக்கு மட்டுமே அந்த வாய்ப்பு உண்டு.

அதைக் கட்டுப்படுத்த ஓர் அமைப்பை உருவாக்கியிருக்கிறது ஃபேஸ்புக். தனது கிளை நிறுவனமான அதற்கு `காலிப்ரா (Calibra)" எனப் பெயரிட்டிருக்கிறது. லாபநோக்கற்ற அமைப்பாக இயங்கும் காலிப்ராதான் இந்த கரன்ஸியின் தாய்வீடு. இந்திய நாணயத்தை ரூபாய் என்ற அலகால் குறிப்பிடுவதுபோல இந்த டிஜிட்டல் கரன்ஸியின் அலகுதான் லிப்ரா.

எந்தத் தேசிய கரன்ஸியைவிடவும் பயனுள்ளதாகவும், நிறைய இடங்களில் ஏற்கும் நாணயமாகவும், குறைவான சிக்கல்களைக் கொண்ட ஒரு முறையாகவும் அமைவதுதான் லிப்ராவின் நோக்கம். உலகம் முழுவதும் எங்குச் சென்றாலும் லிப்ராவைப் பயன்படுத்தலாம். இதனால், எக்ஸ்சேஞ்சுக்காக ஆகும் செலவும் இல்லாமல் போகும். மேலும், சந்தையின் ஏற்ற இறக்கங்களால் பாதிக்கப்படாமலும் இது இருக்கும்.

Mark zuckerberg
Mark zuckerberg
AP

லிப்ராவைப் பயன்படுத்தி மற்ற நிறுவனங்கள் புதுப்புது சேவைகளைக் கொண்டுவரலாம். இப்போதே மாஸ்டர் கார்டு, பேபால், ஊபர், ஸ்பாட்டிஃபை போன்ற பல நிறுவனங்கள் இதற்கு சம்மதம் தெரிவித்திருக்கின்றன. 2020-ல் லிப்ரா பொதுமக்கள் பயன்பாட்டுக்குள் வருவதற்குள் 100-க்கும் மேற்பட்ட பெருநிறுவனங்கள் சேரும் என எதிர்பார்க்கிறார் மார்க். 2020 முதல் வாட்ஸ் அப் மற்றும் மெசேஞ்சர் மூலமாகவும் இதற்கென வெளியாகவிருக்கும் செயலி மூலமாகவும் நாம் லிப்ராவைப் பயன்படுத்தலாம். தேர்டு பார்ட்டி வாலெட்களான பேடிஎம், ஃபோன்பே போன்றவற்றையும் எதிர்காலத்தில் இணைத்துக்கொள்ளலாம்.

பாதுகாப்பும் பிரைவஸியும்தான் லிப்ராவின் முக்கியமான அம்சம்
மார்க் சக்கர்பெர்க்

பாதுகாப்பும் பிரைவஸியும் தான் லிப்ராவின் முக்கியமான அம்சம் என்கிறார் மார்க். ஃபேஸ்புக்கின் இன்னொரு தயாரிப்பு என்றாலும் ஃபேஸ்புக் மூலம் பெறப்படும் தகவல்களை லிப்ராவுக்காகப் பயன்படுத்த மாட்டோம் என்கிறது ஃபேஸ்புக். ஆனால், ஃபேஸ்புக்கின் கடந்தகால வரலாற்றைப் பார்த்தால் பிரைவஸி விஷயங்களில் அவர்களை நம்புவது சற்று சிரமம்தான். வங்கிகளிலும் நம் பிரைவஸிக்கு வழியில்லை என்பது உண்மைதான். நாம் எதற்காகவெல்லாம் அதிகம் செலவழிக்கிறோம் என்ற தகவல்கள் அவர்களிடமும் உண்டு. ஆனால், அவர்கள் அதை வைத்து எதுவும் செய்வதில்லை. ஆனால், ஃபேஸ்புக் அப்படி இல்லையே!

Facebook
Facebook
AP

இணையப் பரிவர்த்தனைகளில் ஏதேனும் தவறு நிகழ்ந்தால் வங்கிகள் அந்தப் பொறுப்பை எடுத்துக்கொள்ளாது. ஆனால், லிப்ரா பரிவர்த்தனைகளில் அவ்வாறு நடந்தால் நமக்கு நம் பணம் திரும்பக் கிடைக்கும் என்கிறார் மார்க். `2050-க்குப் பின் வங்கிகள் காணாமல் போகும். கடன் வாங்கவும், திரும்பக் கட்டவும் மட்டுமே வங்கிகள் தேவைப்படும். பணப்பரிவர்த்தனைகள் எல்லாமே டிஜிட்டலாக நடக்கும்’ என்கிறார்கள் வல்லுநர்கள். அதன்படி பார்த்தால் லிப்ரா அந்தப் புதிய அத்தியாயத்தின் முக்கியமான தொடக்கமாக இருக்கலாம். ஃபேஸ்புக் போல உலகம் முழுவதும் பல கோடி வாடிக்கையாளர்கள் கொண்ட நிறுவனம் இதை செய்யும்போது அது எளிதில் மற்றும் விரைவில் சாத்தியமாகும் என நம்பலாம்.

லிப்ராவுக்கு ஆபத்தும் உண்டு. ஃபேஸ்புக்கை எத்தனை பேர் பயன்படுத்துகிறார்கள் என்று பார்த்தால் எண்ணிக்கை அதிகம்தான். ஆனால், எத்தனை பேர் அதை நம்புகிறார்கள் என்றால், அதில் பாதிக்கும் மேற்பட்டவர்கள் காணாமல் போய்விடுவார்கள். ஃபேஸ்புக் என்ற பிராண்டின் மீதான நம்பகத்தன்மை அவ்வளவு சிறப்பானது கிடையாது. அப்படி நம்பகத்தன்மை உடைய இன்னொரு பிராண்டு லிப்ராவுக்குப் போட்டியாக இன்னொரு டிஜிட்டல் கரன்ஸியைக் கொண்டு வந்தால் மக்கள் அதற்கு ஆதரவு தரலாம். காரணம், பணம் என்பது நம்பிக்கையின் அடிப்படையில் இயங்கும் ஒரு விஷயம்.

Vikatan

எண்கள் நம்மை ஆளத்தொடங்கிவிட்டன. நீங்கள் அதற்குத் தயாராகிவிட்டீர்களா என்பதுதான் இப்போது முக்கியமான கேள்வி.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு