Published:Updated:

தொடுதல் இல்லாத 'Tap and Go'; அதிகப்படியான பணப் பரிவர்த்தனை! - ஒப்புதல் அளித்த ரிசர்வ் வங்கி #corona

'Tap and Go'... ரிசர்வ் வங்கி ஒப்புதல்!
'Tap and Go'... ரிசர்வ் வங்கி ஒப்புதல்!

இது இன்னும் மூன்று மாதங்களில் இந்தியா முழுவதும் நடைமுறையில் வந்துவிடும் என ரிசர்வ் வங்கி அதிகாரிகள் தரப்பில் தெரிவிக்கப்பட்டது.

உலகம் முழுவதும் கொரோனா வைரஸ் பாதிப்புகள் தீவிரமாகப் பரவி வருகின்றது. இதையடுத்து, உலக நாடுகள் அனைத்தும் முடக்கப்பட்டுள்ளன. இந்தியாவிலும் நீடித்த ஊரடங்கு அமலில் உள்ளது. கொரோனா தொற்று, தொடுதல் காரணமாகப் பரவும் என்பதால் மக்கள் பெரும்பாலும் பணத்தை UPI ஆப்கள் மூலமே செலுத்தி வருகின்றனர். சிலர் டெபிட் அல்லது கிரெடிட் கார்டு மூலமாகவும் பணம் செலுத்தி வருகின்றனர். அதிலும் சில புதிய கார்டுகள் மூலமாக மட்டுமே ரகசிய எண்ணைப் பதிவிடாமல் பணம் செலுத்த முடியும்.

இந்தநிலையில், மத்திய ரிசர்வ் வங்கி கார்டு மூலமாகத் தொடுதல் இல்லாமல் பணம் செலுத்தப் பயன்படும் 'Tap and Go' தொழில்நுட்பத்தை அதிக அளவில் பயன்படுத்த தனது ஒப்புதலை வழங்கியுள்ளது . இந்த `Tap and Go' வசதியானது VISA, MasterCard, NPCI போன்ற கார்டுகளில் உள்ளது. இதன் மூலம் வாடிக்கையாளர்கள் ₹ 2000-க்கு குறைவாகப் பொருள்களை வாங்கியிருந்தால் கார்டை Tap செய்தால் போதும். கூடுதலாக ரகசிய எண் போன்ற எதையும் கேட்காது. ₹2000-க்கும் அதிகமாகப் பணம் செலுத்த வேண்டும் என்றால் 'Two factor authentication' முறையில் ரகசிய எண் அல்லது OTP எண்ணையும் பதிவு செய்ய வேண்டி வரும்.

ரிசர்வ் வங்கி
ரிசர்வ் வங்கி

கடந்த சில வருடங்களாகவே உலக நாடுகள் அனைத்திலும் அட்டைகளுக்கான இந்த 'Tap and Go' வசதியானது நடைமுறையில் உள்ளது. இந்தியாவில் சமீபகாலமாகத்தான் இந்த நடைமுறை சில புதிய கார்டுகளுக்கு மட்டும் அறிமுகம் செய்யப்பட்டன. தற்போது கொரோனா தொற்று காரணமாக இதை முழுமையான முறையில் நடைமுறைப்படுத்த ரிசர்வ் வங்கி முடிவு செய்துள்ளது. இந்த 'Tap and Go' வசதியானது RFID - Radio Frequency Identification Technology என்னும் தொழில்நுட்பம் மூலம் இயங்குகிறது.

இந்த தொழில்நுட்பம் மூலம் கடைகளில் இருக்கும் POS (Point of service machine) சாதனத்தில் நம்மால் தொடுதல் இல்லாமல் பணம் செலுத்த முடியும். இந்தத் தொழில்நுட்பமானது தற்போதுதான் அனைத்துக் கார்டுகளுக்கும் அறிமுகம் செய்யப்படவுள்ளது என்பதால் இதை உடனடியாக நம்மால் அனைத்துக் கடைகளிலும் எதிர்பார்க்க முடியாது. இதற்கு முக்கிய காரணம் வங்கிகள் மற்றும் கட்டண சேவை வழங்குநர்கள் (payment service providers) ஆகிய இரு தரப்பினரும் இந்தப் புதிய தொழில்நுட்பத்தை நடைமுறைப்படுத்த வேண்டும்.

இது இன்னும் மூன்று மாதங்களில் இந்தியா முழுவதும் நடைமுறையில் வந்துவிடும் என ரிசர்வ் வங்கி அதிகாரிகள் தரப்பில் தெரிவிக்கப்பட்டது. இந்தப் புதிய தொழில்நுட்பம் நடைமுறைக்கு வந்தப் பின்னரும் பழைய ரகசிய எண்ணைச் செலுத்தி பணம் செலுத்துவதற்கான வசதி இருந்தால் அதையும் பயன்படுத்த முடியும்.

`மாநிலங்களுக்குக் கூடுதல் கடன்;ரிவர்ஸ் ரெப்போ வட்டி 0.25% குறைப்பு!’- ரிசர்வ் வங்கி ஆளுநர் அறிவிப்பு

கொரோனா பேரிடர் காலத்தில் உலகம் முழுவதும் இந்த தொழில்நுட்பம் மூலம் பணம் செலுத்துவது அதிகமாகி உள்ளது. அமெரிக்காவில் மாஸ்டர் கார்டு பயன்படுத்தும் மக்களில் 85 % பேர் இந்த `Tap and Go' வசதியைப் பயன்படுத்தி பொருள்கள் வாங்குவதாக சிஎன்பிசியின் (CNBC) ஆய்வுத் தகவல் தெரிவிக்கிறது.

இந்திய மக்களிடையே 'Tap and Go' தொழில்நுட்பத்தின் பயன்பாடானது எந்த வகையில் இருக்கும் என்பதைப் பொறுத்திருந்துதான் பார்க்க வேண்டும்!

அடுத்த கட்டுரைக்கு