Published:Updated:

வழிமாறும் வாட்ஸ்அப்... வெளியேறி விடலாமா?

வழிமாறும் வாட்ஸ்அப்... வெளியேறி விடலாமா?
பிரீமியம் ஸ்டோரி
வழிமாறும் வாட்ஸ்அப்... வெளியேறி விடலாமா?

ஏற்கெனவே சைலன்ட்டாகச் செய்துவந்த விஷயங்களை இன்னும் விரிவாகவும் வெளிப்படையாகவும் சொல்லியிருக்கிறது வாட்ஸ்அப்.

வழிமாறும் வாட்ஸ்அப்... வெளியேறி விடலாமா?

ஏற்கெனவே சைலன்ட்டாகச் செய்துவந்த விஷயங்களை இன்னும் விரிவாகவும் வெளிப்படையாகவும் சொல்லியிருக்கிறது வாட்ஸ்அப்.

Published:Updated:
வழிமாறும் வாட்ஸ்அப்... வெளியேறி விடலாமா?
பிரீமியம் ஸ்டோரி
வழிமாறும் வாட்ஸ்அப்... வெளியேறி விடலாமா?

‘Simple. Reliable. Secure’... ஆப் ஸ்டோரில் வாட்ஸ்அப் வைத்திருக்கும் டேக்லைன் இதுதான். ‘இதெல்லாம் நம்புற மாதிரி இல்லையே’ என மொத்த உலகையும் கேள்வி கேட்க வைத்திருக்கிறது அதன் சமீபத்திய நடவடிக்கை. நீங்கள் வாட்ஸ்அப் பயன்படுத்துபவராக இருந்தால், கடந்த வாரம் உங்களுக்கும் ஒரு பாப்-அப் மெசேஜ் வந்திருக்கும். பிரைவசி கொள்கைகளையும் பயன்பாட்டு விதிகளையும் (Privacy Policy, Terms and Conditions) மாற்றுவதாக அதில் குறிப்பிட்டது வாட்ஸ்அப். நாமும் எப்போதும் போல ‘Agree’ கொடுத்திருப்போம். அப்படிக் கொடுக்கவில்லை என்றால் பிப்ரவரி 8-ம் தேதிக்குப் பிறகு வாட்ஸ்அப்பைப் பயன்படுத்த முடியாது. இது சமூக வலைதளங்களில் முக்கியப் பேசுபொருளாக மாறியிருக்கிறது. ‘வாட்ஸ்அப் பாதுகாப்பானதா’ ‘மாற்றுகள் தேட வேண்டிய நேரம் வந்துவிட்டதா’ எனப் பல கேள்விகள். என்ன சொல்கின்றன, வாட்ஸ்அப்பின் புதிய பிரைவசி கொள்கைகள்?

ஏற்கெனவே சைலன்ட்டாகச் செய்துவந்த விஷயங்களை இன்னும் விரிவாகவும் வெளிப்படையாகவும் சொல்லியிருக்கிறது வாட்ஸ்அப். புதிதாகக் கொண்டுவரப்பட்டிருக்கும் பணப்பரிவர்த்தனை சேவையான ‘வாட்ஸ்அப் பே’-வுக்குத் தேவையான சில கொள்கைகளைச் சேர்த்திருக்கிறார்கள். இதில் மக்களை அச்சமடையச் செய்வது ‘தேவைப்பட்டால் ஃபேஸ்புக்கின் மற்ற தயாரிப்புகளுடனும் மூன்றாம் தரப்பு நிறுவனங்களுடனும் உங்கள் தகவல்களைப் பகிர்ந்துகொள்வோம்’ என்ற வரிதான். பிரைவசி பிரச்னைகளுக்கென்றே பெயர் பெற்ற நிறுவனம் ஃபேஸ்புக். அதனிடம் தகவல்கள் பகிரப்படும் என்பதுதான் அனைவருக்கும் நெருடலாக இருக்கிறது. ஆனால், 2016-லிருந்தே வாட்ஸ்அப் தகவல்கள் ஃபேஸ்புக்குடன் பகிர்ந்துதான் வருகிறது. 2014-ல் 19 பில்லியன் டாலர் கொடுத்து வாட்ஸ்அப்பை ஃபேஸ்புக் வாங்கியது என்பது நினைவிருக்கட்டும். சரி, போன் நம்பர் போன்ற அடிப்படைத் தகவல்களைத் தவிர அப்படி என்ன தகவல்களை நம்மிடமிருந்து பெறுகிறது வாட்ஸ்அப்?

மொபைல் மாடல், ஓஎஸ், பேட்டரி ஸ்டேட்டஸ், சிக்னல் ஸ்ட்ரெந்த், டைம் ஸோன், IP அட்ரஸ், பணப் பரிவர்த்தனைத் தகவல்கள், ஸ்டேட்டஸ் அப்டேட்கள், குரூப் தகவல்கள், புரொபைல் போட்டோ, பயனர் கொடுத்திருக்கும் ‘About Info.’

அதாவது நீங்கள் அனுப்பும் மெசேஜ் தவிர கிட்டத்தட்ட அனைத்தையுமே பெறுகிறது வாட்ஸ்அப். இது சிக்கல் அல்ல. ஒரு சேவையை வழங்க இதையெல்லாம் ஒரு நிறுவனம் அதன் சர்வரில் சேமித்துத்தான் ஆக வேண்டும். அப்போதுதான் நல்ல பயனர் அனுபவத்தை அதனால் தர முடியும். உதாரணத்திற்கு, உங்கள் புரொபைல் போட்டோவை சர்வரில் சேமிக்காமல் மற்றவர்களுக்கு அதைக் காட்ட முடியாது. மற்றவையெல்லாம் சேவைத் தரத்தை மேம்படுத்தவே பெறப்படுகின்றன. ஆனால், ‘இதை ஃபேஸ்புக்கின் மற்ற தயாரிப்புகளுடன் பகிர்வோம்’ என்னும்போதுதான் சிக்கல் வருகிறது. வாட்ஸ்அப், இன்ஸ்டாகிராம், ஃபேஸ்புக் மெசேஞ்சர் என அனைத்தையும் ஒருங்கிணைக்க வேண்டும் என்ற ஃபேஸ்புக்கின் திட்டம் புரிகிறது. ஆனால், இவ்வளவு நாள்களாக ஃபேஸ்புக் தயாரிப்பு என்றாலும் வாட்ஸ்அப் தனி சேவை, ஃபேஸ்புக் குறுக்கீடு இருக்காது என நம்பிய மக்களுக்கு இது ஏமாற்றத்தைத் தந்திருக்கிறது. அதனால்தான் மாற்றுச் சேவைகளைத் தேட ஆரம்பித்திருக்கின்றனர். மாற்றுகளாக இரண்டு சேவைகளின் பெயர்களே அதிகம் கூறப்படுகின்றன. ஒன்று டெலிகிராம். மற்றொன்று சிக்னல். இந்த மூன்று சேவைகளும் எப்படி வேறுபடுகின்றன? பிரைவஸி, வசதிகள் என அனைத்து விஷயங்களிலும் எது பெஸ்ட்?

வாட்ஸ்அப்

முதலில் வாட்ஸ்அப் பற்றியே பார்ப்போம். மேலே குறிப்பிட்டதுபோல பல தகவல்களைப் பெற்றாலும் மெசேஜ்கள், வீடியோ அழைப்புகள், ஆடியோ அழைப்புகள் என அனைத்துமே எண்டு-டு-எண்டு என்க்ரிப்ட்(E2E) செய்யப்பட்டவை. அதாவது நீங்கள் ஒரு மெசேஜ் அனுப்புகிறீர்கள் என்றால் இங்கிருந்து என்க்ரிப்ட் செய்யப்பட்டே அது அனுப்பப்படும். பெறுநர் சாதனத்தில்தான் அது டீகிரிப்ட் செய்யப்படும். நடுவில் யாராலும் அதைப் படிக்க முடியாது; வாட்ஸ்அப்பாலும்கூட. வாட்ஸ்அப் பயன்படுத்தும் E2E முறை ஓபன் விஸ்பர் சிஸ்டம்ஸ் என்ற நிறுவனத்தால் வடிவமைக்கப்பட்டது. இது ஒரு ஓபன் சோர்ஸ் புரோட்டாகால். பல வல்லுநர்களால் ஆராயப்பட்டு சிறந்த எண்டு-டு-எண்டு என்க்ரிப்ஷன் முறை என அங்கீகரிக்கப்பட்ட முறை இது. இதனால் வாட்ஸ்அப் மெசேஜ்கள் பாதுகாப்பாகத்தான் அனுப்பப்படுகின்றன என நம்பலாம். ஆனால், போனிலும் கிளவுட் சேவைகளிலும் உங்களுக்காக எடுக்கப்படும் பேக்-அப்கள் இதே போன்று என்க்ரிப்ட் செய்யப்படுவதில்லை என்பதைப் புரிந்துகொள்ள வேண்டும். மேலும் மெட்டாடேட்டாவை (metadata) என்க்ரிப்ட் செய்வதில்லை வாட்ஸ்அப். அதாவது நீங்கள் யாருக்கு எப்போது மெசேஜ் அனுப்புகிறீர்கள் என்பது என்க்ரிப்ட் செய்யப்படாது. மற்றபடி ஃபிரன்ட் எண்டில் ஃபிங்கர்பிரின்ட் பாதுகாப்பு, 2FA Authentication எனப் பாதுகாப்பானதுதான் வாட்ஸ்அப்.

வாட்ஸ்அப்பின் உரிமையாளர் ஃபேஸ்புக். இதுதான் இப்போதைய நம்பிக்கையின்மைக்கு முக்கிய காரணம்.

வழிமாறும் வாட்ஸ்அப்... வெளியேறி விடலாமா?

டெலிகிராம்

டெலிகிராம் ஏற்கெனவே பிரபலமாக இருக்கும் ஒரு மெசேஜிங் தளம்தான். ரஷ்யாவைச் சேர்ந்த நிகோலாய் டுரோவ் மற்றும் பாவேல் டுரோவ் ஆகிய சகோதரர்களால் ஆரம்பிக்கப்பட்ட சேவை. ஃபேஸ்புக் நிறுவனர் மார்க் சக்கர்பெர்க் போல அல்லாமல் இருவருமே அரசு சென்சார்ஷிப் தொடங்கி பல விஷயங்களுக்கு எதிராக வலுவான குரல்கொடுத்தவர்கள். உக்ரைன் போராட்டக்காரர்களின் தகவல்களைக் கொடுக்குமாறு ரஷ்யப் பாதுகாப்பு அமைப்புகள் வற்புறுத்தியும், ‘பயனர் தகவல்களைத் தர மாட்டோம்’ என உறுதியாக நின்றவர்கள். இது நம்பிக்கை தருவதாக இருந்தாலும், வாட்ஸ்அப்பைவிடப் பாதுகாப்பு விஷயத்தில் டெலிகிராம் கொஞ்சம் வீக் என்றுதான் சொல்ல வேண்டும். ஆச்சர்யமாக இருக்கிறதா?

டெலிகிராம் எண்டு-டு-எண்டு என்க்ரிப்ட் செய்யப்பட்ட சேவையல்ல. அனைத்து மெசேஜ்களுமே டெலிகிராம் சர்வர்களில் சேகரிக்கப்படும். ‘Secret Chat’ என்ற வசதியைப் பயன்படுத்தினால் மட்டுமே எண்டு-டு-எண்டு என்கிரிப்ஷன் கிடைக்கும். குரூப் சாட் மற்றும் பிற வசதிகளில் E2E இல்லை. சர்வர்களில் இருக்கும் தகவல்களை நீதிமன்றங்கள் உத்தரவிட்டால் மட்டுமே பகிர்வோம் என்கிறது டெலிகிராம். இதுவரை மூன்றாம் தரப்பு நிறுவனங்களிடமும் அரசு அமைப்புகளுடனும் ஒரு பைட் டேட்டாவைக் கூடப் பகிர்ந்ததில்லை என்றும் அடித்து சத்தியம் செய்கிறது டெலிகிராம்.

‘Secret Chat’ பயன்படுத்துகிறார்கள் என்றால் MTProto என்ற புரோட்டாகாலைப் பயன்படுத்துகிறது டெலிகிராம். இது குளோஸ்டு-சோர்ஸ் புரோட்டாகால். இது எப்படிச் செயல்படும் என்பது டெலிகிராமுக்கு மட்டுமே தெரியும். அதனால் இதை முழுவதுமாக பாதுகாப்பானது என உத்தரவாதம் அளிக்க முடியாது.

வசதிகளைப் பொறுத்தவரையில் வாட்ஸ்அப்பை விடவும் அதிக வசதிகள் இருக்கின்றன என்றே சொல்லலாம். இரண்டு லட்சம் பேர் கொண்ட குரூப் எல்லாம் டெலிகிராமில் உருவாக்க முடியும். பிரைவசியை விடுங்கள், இப்படி வசதிகள் கொட்டிக்கிடப்பதால் பைரஸியின் கூடாரமாக டெலிகிராம் இருக்கிறது என்பதுதான் சோகம்.

வழிமாறும் வாட்ஸ்அப்... வெளியேறி விடலாமா?

சிக்னல்

இந்த மூன்றில் மிகவும் பாதுகாப்பான சேவை சிக்னல்தான். ‘சிக்னல் ஃபவுண்டேஷன்’ என்னும் லாபநோக்கற்ற ஓர் அமைப்பால் நடத்தப்படும் சேவை சிக்னல். குறியாக்க நிபுணர்களான மொக்ஸி மார்லின்ஸ்பைக் மற்றும் பிரையன் ஆக்டன் இந்த சேவையை நிர்வகிக்கின்றனர். சரி, சேவையை நடத்தப் பணம் எங்கிருந்து வருகிறது எனக் கேட்கிறீர்களா? நம்மிடமிருந்துதான். உலகமெங்கும் பிரைவசியை விரும்பும் மக்களால் அனுப்பப்படும் நன்கொடையில்தான் செயல்படுகிறது சிக்னல். நீங்களும்கூட சிக்னலுக்கு நன்கொடை அனுப்பலாம். வாட்ஸ்அப்பில் இருக்கும் எண்டு-டு-எண்டு என்க்ரிப்ஷன் முறையை வடிவமைத்த ஓபன் விஸ்பர் சிஸ்டம்ஸ் நிறுவனம் மொக்ஸி மார்லின்ஸ்பைக்குடையது. பிரையன் ஆக்டன், வாட்ஸ்அப் நிறுவனர்களுள் ஒருவர் என்பது குறிப்பிடத்தக்கது. வாட்ஸ்அப்பில் பயன்படுத்தப்படும் அதே மேம்பட்ட எண்டு-டு-எண்டு என்க்ரிப்ஷன் முறைதான் இதிலும் பயன்படுத்தப்படுகிறது. ஆனால், இவர்கள் இன்னும் ஒருபடி மேலே சென்று மெட்டாடேட்டாவையும் என்க்ரிப்ட் செய்கின்றனர். அதனால், யார் யாருக்கு மெசேஜ் அனுப்புகிறார்கள் என்றுகூட சிக்னலுக்கு நிறுவனத்துக்குத் தெரியாது. லோக்கலில் சேவ் ஆகும் ஃபைல்கள்கூட என்க்ரிப்ட் செய்யப்பட்டுதான் ஸ்டோர் செய்யப்படுகிறது. அதனால் பிரைவசிக்கு பெஸ்ட் சிக்னல் என்பதில் மாற்றுக்கருத்தே இருக்க முடியாது.

வசதிகளிலும் பின்தங்கியது அல்ல சிக்னல். வாட்ஸ்அப்பில் இருக்கும் பெரும்பாலான வசதிகள் இதிலும் இருக்கின்றன. சிக்னலுக்கென பிரத்யேகமாகவும் சில வசதிகள் இருக்கின்றன. போட்டோ அனுப்பும் முன் அதிலிருப்பவர்களின் முகத்தை மறைக்கும் வசதி இருக்கிறது. இப்படிப் பட்டியலிட்டுக்கொண்டே போகலாம். வாட்ஸ்அப்புக்கு மாற்று வேண்டுமென்று முடிவெடுத்துவிட்டால் பிரைவசிக்கு சிக்னல்தான் பெஸ்ட். அதிக வசதிகளுக்கு டெலிகிராமுக்கு டிக் அடிக்கலாம். இவை அல்லாமலும் ஹேக், imo என இன்னும் பல சேவைகள் உள்ளன. ஆனால், வாட்ஸ்அப்பை விட்டு வெளியேற முடியுமா என்பதுதான் பெரும் கேள்விக்குறி!

இன்று உலகளவில் வாட்ஸ்அப் பயன்படுத்துபவர்களின் எண்ணிக்கை 200 கோடி. டெலிகிராம் பயனாளிகள் 40 கோடி. சிக்னல் பயனாளிகள் 1-2 கோடி. நாம் மட்டும் மாறி யாரிடம் பேசுவது? யாருடன் ‘சாட்’ செய்வது? ‘யாராவது இருக்கீங்களா? ரொம்ப பயமா இருக்கு’ என்று தேட வேண்டும். குடும்பத்தினர் தொடங்கி நண்பர்கள் வரை அனைவரும் வாட்ஸ்அப்பில்தான் இருக்கின்றனர். அனைவரையும் உடனடியாக மாற்றவும் முடியாது. இதில் அரசுதான் குறுக்கிட வேண்டும்.

புதிய பிரைவசி கொள்கைகளை வெளியிட்ட வாட்ஸ்அப், ஐரோப்பாவிற்கு மட்டும் வேறு கொள்கைகளை வெளியிட்டது. அங்கு ஃபேஸ்புக்கிடம் தகவல்களைப் பகிரமாட்டோம் என்கிறது வாட்ஸ்அப். காரணம் அங்கிருக்கும் கடுமையான டேட்டா பாதுகாப்புச் சட்டங்கள். General Data Protection Regulation, சுருக்கமாக GDPR என்னும் சட்டம் நடைமுறைக்கு வந்த பிறகு டெக் நிறுவனங்கள் மக்கள் தகவல்களைக் கையாள்வதில் அதிக கவனம் செலுத்துகின்றன. அது போன்றொரு சட்டமாகத்தான் Data Protection Bill இந்தியாவில் வடிவமைக்கப்பட்டது. ஆனால், பல நாள்கள் நிலுவையில் இருக்கும் இது இன்னும் சட்டமாகவில்லை. அது வந்தால் மாற்றங்கள் தானாக நடக்கும்!