Published:Updated:

`உலகின் முதல் உயிருள்ள ரோபோ!'- தவளை செல்களிலிருந்து உருவாக்கப்பட்ட `ஜெனோபாட்'

ஜெனோபாட் ரோபோ
ஜெனோபாட் ரோபோ

உயிரியல் இயந்திரங்களான 'ஜெனோபாட்'கள், சுற்றுச்சூழல் நட்பு மற்றும் மனித ஆரோக்கியத்திற்குப் பாதுகாப்பானவை என்று ஆய்வில் தெரிவிக்கப்பட்டுள்ளது.

தவளைகளிலிருந்து ஸ்டெம்செல்களைப் பயன்படுத்தி, உலகின் முதல் உயிருள்ள ரோபோக்களை அமெரிக்காவின் வெர்மான்ட் பல்கலைக்கழகம் (Vermont) மற்றும் டஃப்ட்ஸ் பல்கலைக்கழகத்தைச் (Tufts) சேர்ந்த விஞ்ஞானிகள் உருவாக்கியுள்ளனர். ஆப்பிரிக்காவைச் சேர்ந்த ஜெனோபஸ் லேவிஸ் (Xenopus laevis) என்ற தவளையினத்தின் ஸ்டெம் செல்களைக் கொண்டு உருவாக்கியதால், இவற்றுக்கு 'ஜெனோபாட்' என்று பெயரிடப்பட்டுள்ளது. இந்த இயந்திரங்கள், ஒரு மில்லிமீட்டருக்கும் குறைவான (0.04 அங்குலங்கள்) அகலம் கொண்டவை. இந்த அளவு, மனித உடல்களுக்குள் பயணிக்கப் போதுமானது. இவற்றால் நடக்கவும் நீந்தவும் முடியும். பல வாரங்கள் உணவு இல்லாமல் உயிர்வாழ முடியும்.

ஸ்டெம்செல் என்பது...
ஸ்டெம்செல்கள், நம் உடலில் உள்ள அடிப்படைக் கட்டமைப்பு செல்கள். ஸ்டெம்செல்களுக்கு நம் உடலில் பல்வேறு வகை செல்களாக மாறி வளர்ச்சியடையும் ஆற்றல் உள்ளவை. நம் உடலின் பழுதுபார்க்கும் அமைப்பாகச் செயல்படுவதும் இந்த ஸ்டெம் செல்களே.
`தமிழகத்தில் விரைவில் ரோபோ மூலம் துப்பரவுப் பணிகள்!' - ஜெகதீஷ் ஹிர்மாணி

ஆராய்ச்சியாளர்கள், தவளையின் கருக்களிலிருந்து உயிருள்ள ஸ்டெம்செல்களை எடுத்து, அவற்றைப் பதப்படுத்தி, ஒரு சூப்பர் கம்ப்யூட்டரின் உதவி கொண்டு அவற்றை குறிப்பிட்ட வடிவங்களாக மாற்றியமைத்தனர். பின்னர், இந்த செல்கள் அவற்றின் வேலைகளை சுயமாக செய்யத் தொடங்கின. இந்த ஜெனோபாட்டுகளுக்கு சுயமாகத் தன்னை குணப்படுத்திக் கொள்ளும் திறன் உண்டு. விஞ்ஞானிகள் ஒரு ரோபோவை வெட்டியபோது, ​​அது தானாகவே குணமடைந்து நகர்ந்தது.

இந்த 'உயிரியல் இயந்திரம்' எஃகு மற்றும் பிளாஸ்டிக்கால் உருவான, வழக்கமான ரோபோக்களால் செய்ய முடியாத விஷயங்களையும் செய்யும். வழக்கமான ரோபோக்களைப் போலில்லாமல் உயிரியல் இயந்திரங்களாக, ஜெனோபாட்டுகள் சுற்றுச்சூழல் நட்பு மற்றும் மனித ஆரோக்கியத்திற்குப் பாதுகாப்பானவை என்றும் ஆய்வில் தெரிவிக்கப்பட்டுள்ளது.

கதிரியக்கக் கழிவுகளைச் சுத்தம்செய்வதற்கும், பெருங்கடல்களில் மைக்ரோபிளாஸ்டிக் சேகரிப்பதற்கும், மனித உடல்களுக்குள் மருந்துகளை எடுத்துச்செல்வதற்கும் ஜெனோபாட்டுகள் பயன்படுத்தப்படலாம். ஊட்டச்சத்துகள் இல்லாமலே, பல வாரங்களுக்கு ஜெனோபாட்டுகள் நீர்ச்சூழலில் வாழ முடியும். இதனால் அவை உடலின் உள்ளே மருந்தை எடுத்துச்செல்ல ஏற்றவை. மேலும், மனித உடல் பற்றி அறிய ஆராய்ச்சியாளர்களுக்கு ஜெனோபாட்டுகள் உதவக்கூடும், மனித வாழ்வின் எதிர்கால முன்னேற்றத்திற்கான கதவுகளை இது திறக்கக்கூடும்.

பின் செல்ல