எம்.ஜி.ஆர், ரஜினி, அஜித் பிம்பங்களுக்குப் பின்னால்... - சுகுணா திவாகர் | MGR, Rajini, Ajith behind their Celebrity image - Vikatan Thadam | விகடன் தடம்

எம்.ஜி.ஆர், ரஜினி, அஜித் பிம்பங்களுக்குப் பின்னால்... - சுகுணா திவாகர்

இத்தொடரின் மற்ற பாகங்கள்:
ஓவியம் : ஹாசிப்கான்

மிழ்க் கலாசாரம் என்பதே பல பத்தாண்டுகளாக தமிழ் சினிமாவோடு பிணைக்கப்பட்டதுதான். தமிழர்களுக்கு இசை என்றால்... திரையிசை; இலக்கியம் என்றால்... சினிமா பாடல்கள்; ‘தத்துவம்’ என்ற சொல்லின் விரிவான பொருளை ஒதுக்கிவைத்து விட்டு, ‘சட்டி சுட்டதடா, கைவிட்ட
தடா’, ‘போனால் போகட்டும் போடா’ போன்ற வாழ்வின் நிலையாமையைச் சொல்லும் கண்ணதாசனின் பாடல்களைத் ‘தத்துவப் பாடல்கள்’ என்று வரித்துக்கொண்டவர்கள் தமிழர்கள்.

சொலவடைகளும் பழமொழிகளும் நிரம்பியவை தமிழரின் மரபு. ஆனால், சமீபமாகச் சொலவடைகள், பழமொழிகளின் இடத்தை வடிவேலுவின் நகைச்சுவை வசனங்களும் பிரபல நாயகர்களின் பஞ்ச் டயலாக்குகளும் பதிலீடு செய்கின்றன. இப்படியாக மொழி அமைப்பு தொடங்கி அன்றாட வாழ்வு வரை தமிழ்க் கலாசாரமும் தமிழ் சினிமாவும் பின்னிப் பிணைந்துள்ளன. வெவ்வேறு காலகட்டங்களில் தமிழர்களால் உச்சநாயகர்களாகக் கொண்டாடப் படும் மூன்று நடிகர்கள் குறித்து இந்தக் கட்டுரை ஆராய முயல்கிறது. மாறிவந்த ரசிக மனோபாவத்தின் வழியாக தமிழ்ச்சூழலைப் புரிந்துகொள்ளும் முயற்சி இது என்றும் சொல்லலாம்.

தொடக்கத்தில் இருந்தே இருமை எதிர்வுகளாக எதிரிணை நாயகர்களை உருவாக்கிக்கொண்டாடுவது தமிழ் ரசிக மனோபாவத்தின் அடிப்படை. தியாகராஜ பாகவதர் - பி.யு.சின்னப்பா, எம்.ஜி.ஆர் - சிவாஜி, ரஜினி - கமல், அஜித் - விஜய், சிம்பு - தனுஷ், சிவகார்த்திகேயன் - விஜய்சேதுபதி என்று அது தொடர்கிறது. பொதுவாகத் தமிழர்கள் பிம்பங்களின் அடிப்படையிலேயே தங்களுக்கான உச்ச நாயகர்களை உருவாக்கிக்கொள்கிறார்கள். திரையில் அந்த நடிகர்கள் ஏற்று நடிக்கும் பாத்திரங்கள் வழியாகக் கட்டமைக்கப்படும் பிம்பங்கள் மற்றும் அவர்களது தனிப்பட்ட இயல்புகள் குறித்த தகவல்களின் அடிப்படையிலான பிம்பங்கள் என இருவகையான பிம்பங்கள் வழியாகவும் உச்ச நாயகர்கள் உருவாக்கப்படுகிறார்கள். இந்த பிம்பங்கள் எம்.ஜி.ஆர்., ரஜினி, அஜித் காலகட்டங்களில் எப்படி மாறிவந்திருக்கிறது என்று பார்க்கலாம்.

எம்.ஜி.ஆர் - சிவாஜி, ரஜினி - கமல் என்ற வரிசையில் அஜித் - விஜய் என்ற எதிரிணை நாயகர்களை வைப்பது கொஞ்சம் குழப்பமானதுதான். விஜய்தான் அந்த இடத்துக்கு வருபவர். ஆனாலும், விஜயின் செல்வாக்கை மீறி அஜித்துக்கான ஆரவாரம் ஏன் தூக்கலாக அமைகிறது?

Do you like the story?

Please Appreciate the Author by clapping!

Editor’s Pick