இந்தியாவின் பதினான்காவது குடியரசுத் தலைவர் ராம்நாத் கோவிந்த். இவர் 25.7.2017 அன்று இந்தப் பதவியை ஏற்றுள்ளார். இவர், பாரதிய ஜனதா கட்சியின் சார்பாக குடியரசு தலைவர் பதவிக்கு அறிவிக்கப்பட்டு, அதற்கான தேர்தலில் வெற்றிபெற்றார்.

கல்வி :

உத்தரப்பிரதேச மாநிலத்தைச் சேர்ந்தவர். அக்டோபர் 1, 1945-ம் ஆண்டு பிறந்தவர். கான்பூர் பல்கலைக்கழகத்தில் சட்டக்கல்வி பயின்றார். தில்லி நீதிமன்றத்தில் வழக்கறிஞராகப் பணியாற்றியுள்ளார்.

பணி:

1971-ம் ஆண்டு, புதுதில்லியில் வழக்கறிஞராகப் பணியாற்றியபோது, இலவச சட்ட உதவி மூலம் பெண்கள் மற்றும் ஏழைகளுக்கு பல உதவிகளைச் செய்தார். 1977-78-ம் ஆண்டு இந்தியாவின் பிரதமராக இருந்த மொரார்ஜி தேசாய்க்கு தனிப்பட்ட உதவியாளராக பணிபுரிந்தவர்.

அரசியல்:

1991-ம் ஆண்டு பாரதிய ஜனதாக் கட்சியின் உறுப்பினரானார். 1994-ல் உத்தரப்பிரதேச மாநிலத்தில் இருந்து மாநிலங்களவைக்குத் தேர்ந்தெடுக்கப்பட்டார். 12 ஆண்டுகள் எம்.பி.-யாக இருந்தபோது அமெரிக்கா, பாகிஸ்தான், ஜெர்மனி, ஐரோப்பா, சிங்கப்பூர் ஆகிய நாடுகளுக்குச் சென்றுவந்துள்ளார்.

பதவிக்காலம்:

அடுத்த ஐந்து வருடங்களுக்கு குடியரசுத் தலைவர் பதவியில் ராம்நாத் கோவிந்த் நீடிப்பார்.

- ஜெ.ஆபிரகாம் (மாணவப் பத்திரிகையாளர்)