Published:Updated:

பாஜக-விலிருந்து விலகி புதிய கட்சி தொடங்கிய ஜனார்த்தன ரெட்டி - கர்நாடக அரசியலில் புதிய காட்டுத்தீ!

பசவண்ணர் சிலைக்கு முன் ஜனார்த்தன ரெட்டி.

`அடுத்த 10 நாள்களில் கட்சியின் கொடி, சின்னம் உள்ளிட்டவற்றை அறிவிப்பேன். சில வேட்பாளர்களின் பெயர்களையும் அறிவிக்க வாய்ப்புள்ளது. கொப்பல் மாவட்டத்தின் கங்காவதி தொகுதியில் நிற்பேன்.’ - ஜனார்த்தன ரெட்டி.

பாஜக-விலிருந்து விலகி புதிய கட்சி தொடங்கிய ஜனார்த்தன ரெட்டி - கர்நாடக அரசியலில் புதிய காட்டுத்தீ!

`அடுத்த 10 நாள்களில் கட்சியின் கொடி, சின்னம் உள்ளிட்டவற்றை அறிவிப்பேன். சில வேட்பாளர்களின் பெயர்களையும் அறிவிக்க வாய்ப்புள்ளது. கொப்பல் மாவட்டத்தின் கங்காவதி தொகுதியில் நிற்பேன்.’ - ஜனார்த்தன ரெட்டி.

Published:Updated:
பசவண்ணர் சிலைக்கு முன் ஜனார்த்தன ரெட்டி.

கர்நாடகாவில் பா.ஜ.க முன்னாள் அமைச்சர் ஜனார்த்தன ரெட்டி, குறித்து பட்டிதொட்டியெல்லாம் தெரியும். அந்த அளவுக்கு கர்நாடகத்தில், பெல்லாரி பகுதியில் சுரங்கத் தொழிலில் பெரும் சாம்ராஜ்ஜியத்தை நடத்திவருகிறார். 2016-ல் மகளுக்கு, 650 கோடி ரூபாய் செலவில் திருமணம் செய்துவைத்து, நாட்டையே அதிரச்செய்தவர்.

ஜனார்த்தன ரெட்டி.
ஜனார்த்தன ரெட்டி.

கடந்த, 20 ஆண்டுகளுக்கும் மேலாக பா.ஜ.க-வில் இருக்கும் ஜனார்த்தன ரெட்டி, பெல்லாரி பகுதியில், 1999-ம் ஆண்டு மக்களவைத் தேர்தலில் சோனியா காந்தி போட்டியிட்டபோது, அவரை எதிர்த்து பா.ஜ.க சார்பில் போட்டியிட்ட சுஷ்மா ஸ்வராஜுக்கு தீவிர ஆதரவாகக் களத்தில் நின்றவர்.

தேர்தலில் பணப்புழக்கம்!

அதன் பிறகு இந்த 20 ஆண்டுகளில், பா.ஜ.க-வின் மேலிடத்தில் அமித் ஷா உட்பட பல தலைவர்களுடன் நெருங்கிய தொடர்பு வைத்திருந்ததுடன், பெரும் பண பலம், சமூகவாரியான ஆதரவு என கர்நாடக அரசியல் களத்தில் தவிர்க்க முடியாதவராக இருக்கிறார். இவரின் வரவுக்குப் பிறகுதான், கர்நாடகத் தேர்தல் களத்தில் அதீத அளவு பணப்புழக்கம் ஏற்படத் தொடங்கியது என்ற பேச்சும் உண்டு.

கைதானபோது ஜனார்த்தன ரெட்டி
கைதானபோது ஜனார்த்தன ரெட்டி

கர்நாடகத்தில் நடந்த மாபெரும் சுரங்க ஊழல், நிதி மோசடி வழக்குகளில் தொடர்பில் இருந்ததற்காக, மத்திய குற்றபுலனாய்வுத்துறை அதிகாரிகள் இவர்மீது வழக்கு பதிவுசெய்தபோது தலைமறைவானார். பிறகு நீதிமன்ற உத்தரவுப்படி கைதுசெய்யப்பட்டார். இதைத் தொடர்ந்து, ‘சுரங்க மாஃபியா, கனிம வள மாஃபியா’ என, அனைத்துக் கட்சியினராலும் அழைக்கப்பட்டுவருகிறார். ‘ஜனார்த்தன ரெட்டியின் ஊழல்களை பா.ஜ.க ஆதரிக்கிறது’ என எதிர்க்கட்சிகள் பேசிவருவதால், கடந்த சில ஆண்டுகளாக அமித் ஷா, முதல்வர் பசவராஜ் பொம்மை என பா.ஜ.க-வினர் இவருடனான நட்பைக் குறைத்துவிட்டனர்.

‘தனக்குக் கட்சியில் போதிய செல்வாக்கு இல்லை’ என தன் சகாக்களிடம் நீண்ட நாள்களாகவே ஜனார்த்தன ரெட்டி கூறிவந்த நிலையில், இவரைச் சமாதானப்படுத்த, இவருடைய நண்பரும், தற்போதைய பா.ஜ.க போக்குவரத்துத்துறை அமைச்சருமான ஸ்ரீராமலு முயன்றும் பயன் இல்லை. இந்த நிலையில், பா.ஜ.க–வுடனான தனது, 20 ஆண்டுக்கால உறவை முறித்துக்கொண்ட ஜனார்த்தன ரெட்டி, ‘கல்யாண ராஜ்ய பிரகாதி பக்‌ஷா – கே.பி.பி.ஆர்’ என்ற தனிக்கட்சி தொடங்கியிருப்பது பரபரப்பை ஏற்படுத்தியுள்ளது.

கைதானபோது...
கைதானபோது...

 ‘பிரித்தாளும் அரசியலுக்கு எதிரான...’!

கட்சி தொடங்கிய ஜனார்த்தன ரெட்டி, பெங்களூரில் நிருபர்களிடம், ``நான் பா.ஜ.க–வில் உறுப்பினராக இல்லை என்றும், அந்தக் கட்சிக்கும் எனக்கும் எந்தவிதத் தொடர்பும் இல்லையென்றும் பா.ஜ.க மேலிடத் தலைவர்கள் கூறிவருகின்றனர். ஆனால், மாநில மக்கள் நான் இன்னும் பா.ஜ.க-வில் இருப்பதாக நினைக்கிறார்கள். இதற்கு முற்றுப்புள்ளி வைக்கத்தான், புதிய கட்சியைத் தொடங்கியிருக்கிறேன்.

ஜனார்த்தன ரெட்டி.
ஜனார்த்தன ரெட்டி.

மதம் மற்றும் சாதியின் பெயரால் பிரித்தாளும் அரசியலுக்கு எதிரான பசவண்ணரின் சிந்தனையுடன், கல்யாண ராஜ்ய பிரகாதி பக்‌ஷா என்ற கட்சியைத் தொடங்கியிருக்கிறேன். எங்கள் கட்சி, 2023 பேரவைத் தேர்தலில் போட்டியிடும். விரைவில் மாநிலம் முழுவதும் சுற்றுப்பயணம் செய்து கட்சியை வளர்ப்பேன். நான் தொடங்கிய திட்டங்கள் என்றுமே தோல்வியைக் கண்டதில்லை. தோல்வியை ஏற்றுக்கொள்ளாத சில நபர்களில் நானும் ஒருவன்.

மாநில மக்களின் ஆசியுடன் என் கட்சி வளர்ச்சி பெறும். என் மனைவி, எனது அரசியல் பயணங்களுக்குத் துணை நிற்பார். அடுத்த 10, 15 நாள்களில் கட்சியின் கொடி, சின்னம் உள்ளிட்டவற்றை அறிவிப்பேன். அப்போது சில வேட்பாளர்களின் பெயர்களையும் அறிவிக்க வாய்ப்புள்ளது. கொப்பல் மாவட்டத்தின் கங்காவதி தொகுதியில் நிற்பேன்’’ எனக் கூறினார்.

 ‘கைது செய்யப்பட்டபோது நீதிமன்றம் அவரின் சொந்த ஊரான பெல்லாரி பகுதிக்குள் நுழைய தடை விதித்துள்ளது. இதனால், பெல்லாரியை ஒட்டியுள்ள கொப்பல் மாவட்டத்தில் இருந்து அரசியல் பயணத்தை துவங்க, கங்காவதி தொகுதியில் நிற்க திட்டமிட்டுள்ளார்,’ என்கின்றனர் அரசியல் விமர்சகர்கள்.

கர்நாடகத்தில் இன்னும் ஐந்து மாதத்தில் சட்டமன்ற தேர்தல் நடக்கவுள்ள நிலையில், ஜனார்த்தன ரெட்டி கட்சி துவங்கியுள்ளது, கர்நாடக அரசியல் களத்தில் காட்டுத்தீயை பற்றவைத்துள்ளது; இது பா.ஜ.க–வுக்கு கலக்கத்தை ஏற்படுத்தியுள்ளது.